Бір шаңырақ астында, бір мақсат аясында, бір мүдде жолында тізе қосқан елдің алмайтын қамалы жоқ. Сондай сауапты жолда жұмыс істеп келе жатқан құрылымдардың бірі – Аналар кеңесі. Қазіргі күні біздің кеңесіміз қанатын кеңге жайып, облыстық әрі республикалық деңгейде ізгі істерге бастамашы болып келеді.
Жалпы, Ассамблея туралы айтар болсақ, ол еліміздегі ұлтаралық және конфессияаралық қатынастардың бетке ұстар көшбасшысына айналғаны мәлім. Себебі ҚХА жасап жатқан реформалар мен басқа жұмыстар бейбітшілікті, тыныштықты сақтауға бағытталған, ал бұл өз кезегінде еліміздегі бірлік пен келісімнің нығаюына ықпал етеді.
Жиын барысында Ассамблеяның қоғамдағы рөлін арттыруға қатысты бірқатар ұсыныс айтылды. Өз тарапымнан біріншіден, этносаралық қатынастар мәселелері бойынша мемлекеттік қызметшілердің, сондай-ақ этномәдени орталықтар өкілдерінің біліктілігін арттыру жүйесін жетілдіру, екіншіден, өңірлік ассамблеялар арасында медиация, волонтерлік, қайырымдылық және қоғамдық бақылау бойынша тәжірибе алмасуды қамтамасыз етуді ұсынар едім.
Бір жағадан бас, бір жеңнен қол шығару арқылы жаңа Қазақстанның мызғымас татулығын сақтау – ел халқына аманат!
Гүлсара ТӨЛЕБЕКҚЫЗЫ,
Түркістан облыстық Аналар кеңесінің төрағасы
