Суретте: тәжірибелі сақманшылар Ұлбол Енгебаев пен Сәбит Бейсеубаев.
Сонымен қатар «Сенім» шаруа қожалығы – 3 000 бас, «Дархан» шаруа қожалығы – 2 500 бас, «Құмтекей» және «Тантыбай» шаруа қожалықтары 2 100 бастан арқар-меринос қойын асылдандырумен айналысып отыр.
Бүгінде аудан бойынша 210 659 бас қой-ешкі болса, соның ішінде 104 707 бас саулық төлдеп бітуге таянды. Қазіргі нәтиже бойынша әр жүз саулықтан 95-100 қозыдан алу жоспары толық орындаларына сенім мол.
Биылғы көктем малшылар үшін қолайсыздау болып, біршама қиындық тудырды. Ауа райының құбылмалығына қарамастан жаңа туған төлді аман-есен аяқтандырып, шығынға жол бермеуге бар қажыр-қайраттарын салып, тайлы-таяғымен жұмылып жатыр. Соның бірі – Сарытаудың баурайында 695 бас асыл тұқымды арқар-меринос қойын төлдеткен Жұмаш Суатаев иелік ететін «Ұларлы» шаруа қожалығы.
– Сәуірдің басынан басталған төл алу науқанына тыңғылықты дайындықпен келдік. Бұл сындарлы сәттен мал басын аман алып шығуға он шақты төлші тыным таппай қолғабыс жасап жатыр. «Бірлік бар жерде – тірлік бар» деген, бір кісідей жұмыла еңбек етудің арқасында жаңа туған төлдің енесіне еріп, өрісті жас төлге толтыруға күш салудамыз. Малдың жартысынан көбі төлдеп болды, деген шаруа қожалығының басшысы Жұмаш Суатаев бұған қоса ет бағытындағы 100 бас аналық ірі қараның да бұзау ерткенін тілге тиек етті.
«Мал баққанға бітеді» демеуші ме еді аталарымыз. Сол айтқандай еселі еңбек, төккен тердің арқасында аталған ауданда мал төлдету науқаны жақсы нәтижелермен аяқталар күн
жақын.
Алматы облысы
