Отан қорғаушы күні қарсаңында Ұлытау облысы бойынша «Асық – асыл қазына» деген атаумен асық ойындарының челленджі өткізілді. Мектепке дейінгі, жалпы орта, техникалық және кәсіптік білім беру ұйымдарындағы балалар мен ересектер арасында асық ойындарын кеңінен насихаттау арқылы ұлтымызға тән құндылықтарды дәріптеу, ұлттық ойындар арқылы балаларды дәлдікке, мергендікке, ептілікке тәрбиелеу мақсатын көздеген челленджді облыстық білім басқармасы жанындағы Әдістемелік орталық ұйымдастырды.
Челленджге облыстың барлық балабақша, мектеп және колледждерінің тәрбиеленушілері, оқушылары және студенттері қатысты. Сонымен қатар педагогтер мен ата-аналар үшін жеке алаңдар ұйымдастырылды.
– Біз мұндай іс-шараны облыста алғаш рет ұйымдастырып отырмыз. Аталған іс-шараға қатысушылардың саны 10 мыңнан асып жығылды. Асық – өте ертеден келе жатқан, баланың ой-қабілетін шыңдап, дәлдікке, ептілікке, ширақтылыққа, ұстамдылыққа, алғырлыққа, сыйластыққа тәрбиелеген ұлт ойындарының бірі. Алғашқы ойындардан-ақ көпшіліктің зор қызығушылығы танытқаны байқалды. Мүмкін күзге қарай тағы да жалғастыратын шығармыз, – дейді аталған орталықтың қосымша білім беру және тәрбие бөлімінің басшысы Сымбат Құлмағамбетова.
Ұлытау облысы
