«Бізде екінші деңгейлі банк атанғысы келетін екі ірі микроқаржылық ұйым бар. Олар – KMF және Solva. Олардың портфелі және капитал жеткіліктілік мөлшері банкке айналуға мүмкіндік береді. Былтыр тиісті заңнамалық түзетулер жасалды. Соның арқасында микроқаржылық ұйымның әуелі лицензиясын тапсырып, сосын барып банк лицензиясын алуға өтінім беретін талап жойылды», деді.
Әбілқасымова жаңа банктердің ашылуына қатысты талаптарды жеңілдету үшін банк жүйесі туралы заңға түзетулерді әзірлеп отырғандарын да мәлімдеді.
«Осы түзетулер қабылданғаннан кейін екінші деңгейлі банк ашуға деген ниеттілер көбейеді деп үміттенеміз», деді агенттік басшысы.
Агенттік төрағасы отандық банктерге қатысты қайталама санкция туралы сауалға да жауап берді. Оның айтуынша, біздің қаржы институттары антиресейлік санкцияларды бұзып отырған жоқ.
«Өз тарапымыздан банк жүйесінде ондай қателіктердің болмауы үшін барлық шараны қабылдаймыз. Міндетіміз – отандық банктерге қандай да бір қайталама санкциялардың салынуына жол бермеу. Шетелдік реттеушілер енгізген санкцияға сәйкес болу үшін қазір барлық банк өздерінің комплаенс жүйесін қатаңдатты. Сонымен қатар заңнамалық деңгейде банктер үшін клиенттердің белгілі бір стандарттарды сақтауына қатысты міндетті талап бекітілді. Бұл ақша аударымы, трансшекаралық төлемдерді жүзеге асыруға байланысты. Негізінен, клиенттерді, соңғы бенефициар иелерін тексеру, мониторинг және клиенттер операцияларын зерделеу жүргізіледі. Өз тарапымыздан барлық қажетті нормативтік-құқықтық базаны, тәуекелдерді басқару жүйесіне қатысты талаптарды бекіттік. Ол талаптар тек банк секторына ғана емес, қаржы нарығының барлық салаларына – сақтандыру, бағалы қағаздар және микроқаржы ұйымдарына да арналған», деді М.Әбілқасымова.
Сонымен қатар ол 2022 жылы ресейліктердің біздің банктерден 500 мыңнан астам шот ашқанын да хабарлады. Оның сөзінше екінші деңгейлі банктер шот аша отырып, барлық тиісті тексерулерді жүргізген. Қазір бес банк – Halyk Bank, «Банк ЦентрКредит», Банк ВТБ (Казақстан), Freedom Bank және Bereke Bank отандық және ресейлік азаматтардың «Мир» картасына қызмет көрсетеді. Айтуынша, АҚШ Қаржы министрлігі делегациясы тарапынан «Мир» төлем жүйесін пайдалануға қатысты ешқандай шектеу болмаған.
