Мөлдір бұлақ

«Нұр Отан» партиясы, қала әкімдігі, «АРС» продюсерлік компаниясы мен «Еуразия» бірінші арнасының ұйымдастыруымен өткен «Аялаған Астана» балалар телевизиялық музыкалық байқауы өз мәресіне жетті. Аламан бәйгеде озып шыққан Мұхаммедәли Жүгінісов ендігі кезекте Қазақстанның атын «Детская новая волна» байқауы арқылы әлемге танытады деген сенім бар.  Жақында «Еуразия» арнасының тікелей эфирінен «Аялаған Астана» телевизиялық музыкалық балалар байқауының ақтық сыны көрсетілген болатын. Финалда Қазақстанның әр аймағынан жиналған 17 дарын иесі ерекше қойылымдарымен көпшілік алдында өнер көрсетті. Балалар алдына әуелі байқауда озып шығуды, сөйтіп, 1 миллион теңгені қанжығаға байлауды мақсат етіп қойған еді. Бұл меже орындалды. Ендігі шың «Детская новая волна» сайысының биігін бағындыру, Қазақстанды таныстыру болып табылады. Телевизиялық шоуда жас өнер­паздар Руслан Ботабаев бастаған «Zaratushtra Band» оркестрімен жанды дауыста ән шырқады. Кейбір қатысушылар дуэтте, енді бірі триода өнер көрсетті. Жалпы концерттік бағдарламаға 12 қойылым әзірленді. «Балалық шақтың әнұраны» атты байқаудың алғашқы күні қа­ты­сушылар балалар әндері репер­туарынан музыкалық шығар­ма­лар орындаса, екінші күні әйгі­лі мульт­фильмдердегі әлемдік хит­тер­ді, ал «Атамекен» атты қоры­тын­дыда балғын әншілер Астанаға, барша қазақстандықтарға арнап ән салды. Халықаралық қазылардың шешімі мен тікелей эфирден SMS арқылы дауыс берудің нәти­жесі бойынша елордалық Мұхаммедәли Жүгінісов «Аялаған Астананың» жеңімпазы атанды. Ол байқаудың үш күнгі нәтижесінде де қатарластарынан оқ бойы озық көрініп, қазылар алқасының ең жоғары бағасына ие болды. Айта кету керек, ерекше дауыс иесі биыл Қазақстанды «Детская новая волна» байқауында таныстырмақ. Бақытты сәтін ірке алмай жанарына жас тұнған өрен: «Менің арманым «Детская новая волна» байқауына қатысып қою ғана емес, әлемдік эстраданың жарық жұлдызы атанған Майкл Джексон секілді және өзімнің туған ағам Рүстем Жүгінісов сияқты атақты әнші болу», – дейді. Өнер сайысының бірінші жүл­десі – Орал қаласынан келген Дания Ишанқұлованың, екінші орын – «Балапандар» триосындағы Луиза Нұрқуатова (Ақтау), Алдияр Орекен (Екібастұз), Жанайкерім Өтегенованың (Қостанай), ал үшінші жүлде алматылық Ясмин Мәжитованың еншісіне тиді. Бұған қоса, Д.Ишанқұлова көрермендер көзайымына айналды. Астана қаласы әкімдігінің арнайы сыйлығы Павлодар қаласының намысын қорғап келген Настя Першиковаға бұйырды. Ал, Сыр елінің саңлағы Диас Омар «Нұр Отан» партиясының сыйлығына ие болды. Еске сала кетейік, алғаш рет бұл жоба былтыр жүзеге асқан болатын. Іріктеу кезеңінде Қазақстанның 16 қаласынан 8 бен 12 жас аралы­ғындағы 1000-ға жуық дарынды бала бақ сынады. Әнді сүйетін, сахнада өнер көрсетуді армандайтын балалар үшін бұл нағыз мерекелік тарту болды десек, қателеспейміз. Торғын ӘБУШАХМАН.