Медбикелер күнін белгілеу туралы мәселе алғаш рет 1953 жылы жаһандық деңгейде көтерілген. Тек 12 жыл өткен соң дүниежүзі бойынша медбикелер күні ресми түрде бекітілді. 1974 жылы медбикелердің Халықаралық кеңесі аталған мерекені мамырдың 12-сі күні тойлауды ұсынды. Себебі, дәл осы күні медбикелер қызметінің негізін қалаушылардың бірі Флоренс Найтингейл өмірге келген. Ол XX ғасырдың басында Англияның медицинасын түбегейлі өзгертіп, медбикелер қызметінің ашылуына себеп болған. Сол кезеңнен бері медбикелер өздеріне жүктелген міндеттерді адал атқарып келеді. Солардың арасында Ұлттық ұлан сапында қызмет ететін ақ халатты абзал жандар да бар.
«Медицина саласына жолдасымның бағыт-бағдар беруімен, қолдауымен және кеңесімен келдім деп айта аламын. Ол кісі де негізінен осы әскери қызметте жүрген азамат. Сонысымен де медицинаға әрі әскери өмірге келуіме ықпал етті. Жалпы өзімнің анам да медбике болып жұмыс істеген. Бірақ бұл салада көп тұрақтаған жоқ. 5 жыл еңбек еткен соң, жеке кәсіпкерлікке бет бұрды. Ал мен болсам 2009-2012 жылдар аралығында Шымкенттегі «Авиценна» медициналық колледжінде білім алдым», деді өзін Аселия Тәңірбергенова деп таныстырған ефрейтор.
2020 жылдан бері 6636 әскери бөлімінде қызмет етіп жүрген Әселия Жақсыбекқызы медбикелердің дәрігер бекіткен нұсқама бойынша ғана жұмыс істейтінін әрі оларға зор жауапкершілік жүктелетінін тілге тиек етті. Мысалы, әр науқасқа белгіленген дәрісін беру, екпе салу, система қою секілді жұмыстар медбикенің басты шаруаларына жатады. Бұған жарақатпен келген адамның жаралы тұсын залалсыздандырғаннан кейінгі тану процестерін де қосуға болады.
«Елордаға келмес бұрын Семей қаласындағы әскери бөлімде жұмыс істегенмін. Еңбек жолым сол жерден басталды. Кейін отағасы жұмыс орнын ауыстырған соң, менің де өмірімде өзгеріс болды. Осылайша, осы жерде жұмыс істеуге мүмкіндік туды. Бақытыма орай, мұнда да жаны жайсаң мамандармен әріптес болдым. Бүгінде бір-бірімізбен бірлігі жарасқан, білікті ұжымдардың біріміз деп мақтанышпен айта аламын. Басшылық құрам әркез қолдап, білмегенімізді айтып, көп дүниені үйретті», дейді медбике Аселия.
Ізгілік жолында жүрген жандардың қай-қайсысы болмасын құрметке лайық. Сондықтан да адам жанына арашашы дәрігерлердің, фельдшерлердің және медбикелердің мемлекет үшін маңызы зор. Соның ішінде әскери салада жүргендеріне жүктелетін жауапкершілік жүгі ауыр. Өйткені олар Гиппократ алдындағы антынан бөлек, Отан алдындағы антқа да адалдық танытуы тиіс. Қатардағы медбикелеріміз бейбіт күннің тынышы кетер болса, ел мен жерді қорғайтын ерлеріміздің қамқоршы періштесіне айналады. Олар өз міндеттерін атқара жүріп, қару қолдануды, әскери ережелер мен Жарғыларды жақсы біледі. Әскери медбике Аселия Жақсыбекқызының еңбегін 6636 әскери бөлімінің медициналық пункт бастығы да жоғары бағалап отыр.
«Әскерде мамандар ер не әйел деп бөлінбейді. Біздің жұмысқа күннің суығы да, ыстығы да кедергі емес. Міне, осының бәріне әбден төселген мамандардың бірі – Аселия Жақсыбекқызы. Ол қызмет барысында ұқыпты. Батыл шешім қабылдай біледі. Ол күндіз де, түнде де әскери қызметін абыроймен атқарып келеді. Біздің медбикелер күнделікті жұмыс барысында полигондарға барып, ату жаттығуларына да қатысады. Түрлі іс-шаралар біздің қатысуымызсыз өтпейді. Өйткені, біздің сарбаздар мен сардарлардың медициналық тұрғыдағы қауіпсіздіктеріне біз жауаптымыз. Жеке құрам қайда болса, біз де сол жерден табыламыз. Қызметкерлеріміз мұндай жағдайларға әркез дайын», деді медициналық пункт бастығы капитан Жеңіс Базарбаев.
Әскери бөлімдегі медбикелердің айтуынша, әскери қызметшілер ауа-райының күрт сууы кезінде көбірек шағым айтып келеді. Әсіресе жоғарғы тыныс жолдарының аурулары жиі кездесіп жатады. Мұндайда абзал жандар қабылдауына келген науқастардың денсаулығын тексеріп, дәрігерге дейінгі процедураларды орындай алады. Әрі қарай мамандандырылған ем-дом көрсетіледі. Осы аралықтағы алғашқы медициналық көмек медбикелер арқылы жасалады. Біз бүгінгі кейіпкерімізбен сөйлесіп болған сәтте өзін жайсыз сезінген қатардағы жауынгердің бірі тексерілуге келді. Медбикенің қолындағы құрал сарбаздың қызуы 37 градустан асқанын анықтады. Ефрейтор Аселия бұл жағдайдың алаңдатарлық екенін айтты. Арнайы ем-домнан соң, бірнеше минуттан кейін науқастың дене қызуы қайта өлшенеді. Мамандар содан соң нақты бір ұйғарымға келуге тиіс...
Осы мезетте біз олардың жұмысына кедергі келтірмес үшін қоштасып, қызметтеріне сәттілік тіледік.
Айта кетейік, бүгінде Қазақстанның медициналық мекемелерінде 188 мыңнан астам, ауылда 54 мыңнан астам, бастапқы буын деңгейінде 65 мың орта медицина қызметкері жұмыс істейді.
Қатардағы Жанболат КЕНЖЕҒҰЛ
