Былтырғы жылдың тамыз айында атақты америкалық боксшы Деметриус Андраде орта салмақтағы WBO нұсқасының чемпиондық атағынан бас тартқаннан кейін алтын белбеу ресми түрде Жәнібек Әлімханұлына табыс етілген еді. Арада бірер ай өткен соң ол Лас-Вегастағы жарыста Дензел Бентлиді ұпай санымен ұтып, алғаш рет өз атағын сәтті қорғады. Кеше қандасымыз әлем чемпионы ретінде екінші рет шаршы алаңға шықты.
27 жастағы Стивен Батлер 2014 жылдан бері кәсіпқойлар арасында өнер көрсетіп жүр. Сол аралықта ол 37 кездесу өткізіп, 33 рет жеңіске жетті. 26 қарсыласын есінен тандырды. Үш рет ұтылып, тағы бір бәсекеде тең есеп тіркелді. Канадалық былғары қолғап шебері тек өзінің отандасы Брэндон Кук, жапониялық Риота Мурата және мексикалық Жосе де Жесус Масиасқа ғана есе жіберді. 2017 жылы Геннадий Головкин мен Сауль Альварес алғашқы жекпе-жектерін өткізген кезде дәл осы Батлер «Канелоның» спарринг-партнері болған.
Стоктондағы бәсеке 12 раундқа есептелгенімен, ол ұзаққа созылмады. Боксшылар рингке шыққан бетте сырт көзге Стивеннің қатты қобалжып тұрғаны анық байқалды. Соның алдында ғана «Жолбарыстың жүрегіне жерік болған аналар мен қасқыр мінез бабалардың ұрпағымын!», деп жалпақ жұртқа жар салған Жәнібек өзіне сенімді болды. Иә, Үйеңкі жапырақтар елінің өкілі бекер сескенбеген екен. Бәсеке басталған бетте қазақтың өр мінезді өрені бұл салмақтың қожайыны кім екенін бірден аңғартты. Ол бірден екпіндеп шабуылдап, қарсыласын тығырыққа тіреді.
Барлық мәселе екінші раундта шешілді. Әлімханұлы әуелі қарсыласын екі рет нокдаунға жіберді. Бірінші нокдауннан кейін-ақ Батлердің беті қайтты. Аяқтары ұстамай, рингте өзінің не істеп, не қойып жүргенін түсінбей қалды. Сол кезде төреші бәсекені тоқтатса да болар еді. Бірақ кәсіпқой бокстың өз заңы бар. Ертең алып-қашпа әңгімелер өрбімеу үшін канадалыққа тағы бір мүмкіндік берілді. Мұнысы бекер екен. Арада санаулы секундтар өткенде Жәнібек апперкот соққысымен қарсыласын есеңгіретіп алды да, сол қолымен құлақ-шекеден ұрды. Стивен кескен теректей құлады. Нокаут!
Сөйтіп, өзінің спорттық мансабында 14 рет жеңіс тойын тойлаған Жәнібек Әлімханұлы чемпиондық атағын екінші мәрте сәтті қорғады. Кездесу аяқталған бетте ол «Қайдасыңдар, чемпиондар! Канело, Чарло, мен сендерді күтіп жүрмін. Менімен жекпе-жекке шығыңдар! Ертең жұдырықтасайық десеңдер де даярмын. Өйткені орта салмақтың патшасы менмін!», деп арқалана сөйледі.
