«Облысымыз білекті де жүректі балуандардан кенде емес. Тұңғыш «Қазақстан барысы» Ұлан Рысқұл біздің өңірдің тумасы екені баршаға мәлім. Былтыр бұл жобаның 10 жылдық мерейтойы аталып өтті. Осы жылдар аралығында облысымыз дүбірлі додаға өзінің апайтөс балуандарын қосып келеді. Ал өңірдегі кіл мықтыдан кім мықты екені бүгінгі сайыста белгілі болады. Сондықтан турнирге қатысушыларға сәттілік тілей отырып, республикада Алматы облысының мерейін асқақтатар нағыз шебер жеңіске жетсін», деді жарыстың ашылу салтанатына қатысқан аймақ басшысы Марат Сұлтанғазиев.
Қонаев қаласының орталық алаңында өткен турнирде аймақтың түкпір-түкпірінен салмағы 90 килодан жоғары 28 балуан белдесті. Олардың барлығы өз өңірлерінде үздік үштіктен көрінген спортшылар.
Жарыс қорытындысында барлық қарсыласын тізе бүктіріп, «Алатау арланы» атанған Қонаев қаласының өкілі Мәди Еділбаев алтын белбеудің иесі атанып, 5 млн теңге ақшалай сыйлыққа ие болды. Енді Мәди республикалық турнирде облыстың намысын қорғайтын болады.
Ал Еңбекшіқазақ ауданынан шыққан балуан Нұрғали Жолтаев екінші орынды иемденіп, 1 млн теңгенің сертификатын алса, Балқаш ауданынан қатысқан Әлімжан Жұмахметов үшінші орынға табан тіреп, 500 мың теңгені қанжығасына байлады.
Алматы облысы
