Жалпы, облыс бойынша 3420 шақырым жол бар. Оның ішінде республикалық маңызы бар жолдың ұзындығы 1016 шақырым. Былтырғы жыл соңында осы санаттағы 204 шақырымдық «Қызылорда –Жезқазған» тас жолын жөндеуге дайындық басталып, осы жылы мердігер компаниялар жұмысқа кірісті.
Сонау сексенінші жылдары Маңғыстаудан әкеліп төселген битумның жұқанасы ғана қалған күре жол туралы осыған дейін де талай мәрте жазылған еді. Өңірлік коммуникациялар қызметінің ұйымдастыруымен өткен көшпелі брифингте Шу бағытына қарағанда, Қызылорда мен Астана арасын 700 шақырымға жақындата түсетін күре жолдағы қауырт тірлікті көрудің сәті түсті.
Алты лот бойынша жарияланған конкурстың төртеуінде жеңімпаз анықталып, жұмысты бастап кеткен. Шетелдік компаниялар біздің елде жұмыс істеуге рұқсат беретін ресімдерден өтіп, жолдың негізгі қабаты мен айналма жол салып жатыр. Ал олардан бұрын қимылдаған жергілікті «Қыран» жауапкершілігі шектеулі серіктестігі асфальт төсеуді қолға алыпты.
Күре жолдың бойында қалқайып тұрған күн батареялары көзге жиі түсе берді. Бұрын Қызылордадан сәл ұзағаннан Жезқазғанға жеткенше байланыстың жоқтығынан құлаққа ұрған танадай болатын едік. Мердігер компаниялар бұл мәселені уақытша осылай шешіп отыр екен. Мамандардың айтуынша, жол құрылысы біткен соң бұл маңда да жолаушыға қызмет көрсететін сервистік кешендер бой көтермек.
«Былтыр Мемлекет басшысының тапсырмасымен басталған жол құрылысы аясында 2022-2025 жылдар аралығында «Қызылорда-Жезқазған» бағытындағы автожолдың облысқа қарасты 204 шақырымы қайта жаңғыртудан өтеді. Қазір осы маңызды нысан облыс басшылығының тікелей назарында тұр. Сыр мен Арқаны байланыстыратын күре жол құрылысы аймақтың әлеуметтік-экономикалық дамуына оң әсер беретіні сөзсіз», дейді облыстық жолаушылар көлігі және автомобиль жолдары басқармасы басшысының орынбасары Жәнібек Сыздықов.
Боз жусанды иен далада өндіріс орындары қоныс тебе бастапты. Қаладан 100 шақырым асқанда 160 тонналық асфальт зауыты, тағы бір 70 шақырымнан кейін осындай 240 тонналық қондырғы тұр. Мамандардың айтуынша алда тағы бір зауыт тұрғызылады.
«Құрылысты техникалық қадағалау «DONWA Engineering Co. LTD» мен «M50 Consalting Group» компанияларына жүктелген. «Қазавтожол» ҰК» АҚ жалпы үйлестіру, мониторинг жұмыстарына жауапты», дейді «Қазавтожол» ҰК» АҚ Қызылорда филиалы директорының орынбасары Ерсайын Мұзафар. – Жолдың ені – 9 метр, үш қабаттық қалыңдығы 27 сантиметр болады. Жөндеу жұмыстары барысында қолданылып жатқан құрылыс материалдары Жаңақорған ауданындағы Шалқиядан тасымалданып жатыр.
Жолдың жаңғыруы аймақ дамуына ерекше бір серпіліс беретіні анық. Автомагистраль елдің оңтүстігі мен орталығын тікелей байланыстырып, Сыр өңіріне инвестиция тарту аясын кеңейтеді, туристік әлеуетін арттыра түседі. Жүк тасымалы көлемінің артуы өңірде кәсіпкерліктің өрістеуіне үлкен сеп болмақ.
ҚЫЗЫЛОРДА
