Көпшілік елордадағы бәсекені тағатсыздана күтті. Өйткені осы матчта жеңіске жеткен команда жеке-дара көш бастайтын еді. Бірінші таймада Вараздат Ароян (17 минут) мен Марин Томасов (27 минут) алаң иелерін алға шығарды. 39 минутта «Қызылжардың» ойыншысы Хосе Витор есеп айырмашылығын қысқартты. Үзілістен кейін де шиеленісті ойын жалғасты. 89-минутта Иван Граф пенальтиден таразы басын теңестірсе, төреші қосқан уақытта Эльхан Астанов астаналықтарға жеңіс сыйлады. Есеп – 3:2. Осы табысының арқасында 25 ұпай жиған «Астана» жарыс кестесінде көш бастады. «Қызылжардың» олардан үш ұпайы аз. Бірақ Солтүстік Қазақстан облысының өкілдері елордалық клубтан бір ойын кем өткізді.
«Жетісу» Талдықорғанда «Атыраудан» 0:3 есебімен ойсырай ұтылса, Қарағандыда «Шахтер» Павлодар облысынан келген «Ақсу» клубынан айласын асырды – 2:1.
