Дін • 22 Мамыр, 2023

Діни сауаттылық маңызды

424 рет
көрсетілді
2 мин
оқу үшін

Кейінгі жылдары жастардың дәстүрлі дінге қарсы деструктивті ағымдардың жетегінде кетуі қоғамды алаңдатып отырған күрделі мәсе­леге айналды. Осы орайда адамзат үшін үлкен қауіп-қатер туғызып отырған терроризм мен діни экстремизмнің алдын алуда өскелең ұрпақ тәрбиесіне ерекше көңіл бөлу маңызды.

Діни сауаттылық маңызды

Алматы қаласы Дін істері жөніндегі басқарма­сының қолдауымен «Адам және қоғам» үкіметтік емес ұйымының ұйымдастыруымен діни экстремизм мен терроризмнің алдын алу мақсатында білікті теологтар, дінтанушылар, сарапшылар, психолог және философтардың қатысуымен Алматы қаласының 100-ге жуық жалпы білім беру мекемелері мен колледж­дер мұғалімдеріне арналған 12 сағаттық семинар өтті.

Дін саласындағы келеңсіздіктердің алдын алуда діни сауатсыздыққа жол бермеу, дәстүрлі діни түсінікті жастар бойында қалыптастыру – мемле­кеттік қауіпсіздіктің алдын алуда ерекше назар аударатын мәселе. Осы орайда семинар барысын­да мамандар тарапынан деструктивті діни ағым идеологиясының қоғамға қаупі және оған қарсы қолданылатын дәлелдер мен әдіс-тәсілдер, зайыр­лылық түсінігі, ғаламтор кеңістігінде күмәнді діни ақ­параттардың таралуын болдырмау және оған қар­сы тиімді насихаттық жұмыстарды жүргізу әдіс­те­рі­мен қатар дін саласына қатысты ақпараттар берілді.

Алматы қаласы Дін істері жөніндегі басқармасы басшысының орынбасары Ерғали Көшеке атап өткендей, бүгінде дін саласындағы мемлекеттік саясаттың негізгі бағыттарының бірі діни экстремизм идеологиясының таралуының алдын алу, дәстүрлі емес діни идеологияның таралуына қарсы насихат жұмыстарын жүргізу маңызды. Діни экстремизм идеологиясының таралуына қарсы күресте жалпы білім беру мекемелері мен колледждердің мұғалімдері осы семинардан орасан тәжірибе алып, жұмыстарында тиімді пайдалана алады.

Семинар оқытушысы, «Нұр-Мүбәрак» Мысыр ислам мәдениеті университеті Діни экстремизмге қарсы іс-қимыл орталығының директоры Тимур Нүсіпханұлы қатысушыларға деструктивті діни ағымдардың ерекшеліктері, экстремистік және террористік ұйымдарға тартудың психологиялық әдістері, сондай-ақ қоғамдық қауіпсіздікті сақтау мен мемлекеттің өркендеуі үшін конфессияаралық келісімнің маңыздылығы туралы айтты.

Семинарда мамандар қатысушылар сұрақтарына жауап беріп, арнайы сертификаттар табыс етілді.

 

АЛМАТЫ