* Шығыс Қазақстан облысы Күршім ауданының 265 тұрғыны 3 жылда бизнесті дамытуға 600 млн. теңге несие алды. Кәсіпкерлердің осынша көлемдегі қаржыға қымыз, бидай, бал, жұмыртқа, өсімдік майы, қарбыз, пима сияқты азық-түлік және өнім түрлерін дайындауды қолға алғанын айтқан облыс әкімі Бердібек Сапарбаев мұның бәрінің «Жол картасы-2020» бағдарламасы арқылы қол жеткенін алға тартты.
*Солтүстік Қазақстанда инвестиция көлемі жарты жылда 7,2 пайызға артты. Статистика департаментінің басшысы Ольга Перепечинаның айтуынша, жылдың алғашқы жартысында бұл көрсеткіш 34,3 млрд. теңгені құраған. Соның ішінде негізгі капиталға тартылған инвестицияның 79,8 пайызы шаруашылық субъектілерінің жеке қаржысы, 12 пайызы мемлекеттік бюджет қаржысы, 6,5 пайызы өзге де заем қаражаттары, 1,7 пайызы банк несиесі болған.
*Шымбұлақ шатқалында даунхил паркі қатарға қосылды. Осындағы тау шаңғысы курорты жаз мезгілінде велоспорт маусымын ашты. Ол велосипедпен таудан құлдилау – кәсіби даунхил байк трассасының пайдалануға берілуі арқасында мүмкін болды.
*Шымкентте жұртшылыққа «Электронды қазақ үй» жобасы таныстырылды. Бұл шара кеше облыстық ішкі саясат басқармасының қолдауымен «Оңтүстік Қазақстан» газетінің баспасөз орталығында өтті. Электронды қазақ үй 4 негізгі бөлімнен тұрады.
*Қызылорда облысының Шиелі ауданында алғашқы роботтандырылған дәріхана ашылды. Мұндай форматтағы фармамаркет бұған дейін Астана және Өскемен қалаларында қатарға қосылған еді. Екі қабаттан тұратын дәріхананың алғашқы қабатында фармамаркет орналасқан. Ал денсаулық пен сұлулыққа арналған екінші қабатында УДЗ, косметолог, педиатр, терапевт, массаж бөлмелері бар. Дәріхана күн сәулесі энергиясымен қамтамасыз етілген.
*Кеше Алматыда 200 мұқтаж отбасыға азық-түлік таратылды. Ол «Рамазан сыйы» акциясы аясында өтті. Алматы Орталық мешіті мен «Зекет» қоры мұқтаж отбасыларға ұн, қант, күріш, сұйық май, макарон өнімдерінен тұратын азық-түлік пакетін ұсынды.
Хабарлар «ҚазАқпарат», BNews.kz, Altaynews.kz,
Egemen.kz сайттарының деректері бойынша дайындалды.
