Жаңа пәтерлер және балабақша

Жақында Шымкент қаласының «Нұрсәт» шағын ауданында бой көтерген көпқабатты үйден 31 азаматқа пәтер кілті тапсырылды. «Жұмыспен қамту-2020» бағдарламасы аясында салынған үйге шалғайдағы әлеуеті төмен ауылдардан көшіп келген отбасылар мен ата-ана қамқорлығынсыз қалған жандар  қоныстанды. Салтанатты шараға қатысқан облыс әкімінің орынбасары Әли Бектаев қуаныш иелеріне пәтер кілтін табыстап, құттықтады. Оңтүстік Қазақстан облысында бүгінге дейін «Жұмыспен қамту-2020 жол картасы» бағдарламасы шеңберінде қоныс аударуға өңірлік комиссияның ұсынымын алған 449 отбасы салынған 6 көпқабатты үйге қоныстанған. Қоныс аударғандардың ішінен еңбекке қабілетті 614 адамның 433-і тұрақты жұмыспен қамтылып, 30-ы әлеуметтік жұмыс орындарына жіберілсе, 12 адам кәсіби білім алуда. «Нұрсәт» шағын ауданы барған сайын қанатын кеңге жайып келеді. «Қолжетімді тұрғын үй - 2020» мемлекеттік бағдарламасы аясында салынып жатқан көпқабатты 84 үйдің 47-сі облыс бюджетінің есебінен қаржыландырылуда. Оның 21-і үстіміздегі жылы пайдалануға берілмек. Бұл үйлердегі пәтерлердің басым бөлігі әлеуметтік әлсіз топтарға арналған. Шағын аудан шығысындағы іскерлік-әкімшілік орталығында да жаңа ғимараттар бой көтеруде. Шымкент қаласында, сондай-ақ, 140 орын­дық «Аружан» балабақшасы ел игілігіне тапсы­рылды. Кезінде жекеменшікке өтіп кеткен бұл ғимарат бүгінде мемлекетке қайта­рылып, мектепке дейінгі мекеме ретінде қай­та құрылды. Игілікті шараға арнайы келген Шымкент қаласының әкімі Дархан Сатыбалды бүлдір­шін­дер мен педагогикалық ұжымды балабақ­шаның ашылуымен құттықтап, ғимаратты аралап көрді. БАҚ өкілдеріне сұхбат берген қала әкімі Д.Сатыбалды: «Облыс орталығы Шымкент қаласында «Балапан» бағдарламасы аясында бүлдіршіндерді қамту 2009 жылы 28 пайыз болса, биыл 70 пайызды құрап отыр»,  − деді. Бүгінде Шымкент қаласында 256 балабақшада 41 мыңнан астам бала тәрбиеленуде. Мархабат БАЙҒҰТ, «Егемен Қазақстан».