Жас таланттарды ашқан «Жас дәурен»

Облыс орталығындағы Қазақстан Республикасының Тұңғыш Президенті Н.Назарбаев атындағы мәдениет және демалыс саябағында Ақтөбе қаласының 145 жылдығына арналған он жетінші дәстүрлі облыстық жастар мен студенттердің «Жас дәурен-2014» фестивалі өткізілді. Облыс әкімдігінің қолдауымен, облыстық мәдениет, мұрағаттар және құжаттама басқармасы мен облыстық халық шығармашылығы үйінің ұйымдастыруымен өткізіліп келе жатқан «Жас дәурен» фестивалі – әрбір жастың сеніміне қанат бітірген, жастық жігерін жанып, жүрегіне асқақ арман ұялатқан, өндірдей жас талаптардың өнеріне жол ашатын маңызды мәдени шара болып табылады. Фестиваль екі кезеңде, аудандық және облыстық деңгейде өткізіліп отыр. Өнер фестиваліне биыл 150-ге тарта қала, аудан жас­тары қатысып, «Эстрада – вокал», «Хореография», «Шығармашылық шеберлік» номинациялары бойынша өнерлерін ортаға салып, бақтарын сынады. Фестивальдің «Эстрада-вокал» номинациясының бас жүлдесін ойылдық Ермұхамбет Махметов, «Хореография» номинациясында екінші орынды Мәртөк ауданының «Позитив Грен» би ансамблі және «Шығармашылық шеберлік» номинациясы жүлдесін хромтаулық Естай Өтеулиев алды. Сатыбалды СӘУІРБАЙ, «Егемен Қазақстан». Ақтөбе облысы.