72 отбасының мәселесі шешілді
Мемлекет басшысы Қасым-Жомарт Тоқаев бірер жыл бұрын еліміздегі ірі әрі әлеуетті компаниялар мен алып серіктестік басшыларына әлеуметтік жобаларды жүзеге асыруды шегелеп тапсырғаны белгілі. Президент пәрменін «Қазфосфат» ЖШС-нің жаңадан тағайындалған басшылары да назардан тыс қалдырған жоқ. Олар бірінші кезекте жұмысшылардың жағдайын жасауға білек түріп кіріскен сыңайлы. Басшылық алдымен қызметкерлердің әлеуметтік мәселелерін шешуге айрықша ден қойған. Осы орайда серіктестік басшыларымен жүздесіп, бірқатар тірліктің тиянақты атқарылғанына көз жеткізгендей болдық.
«Қазфосфат» ЖШС-нің бас директоры Ғани Тоқсанбаевтың айтуынша, кейінгі уақытта кәсіпорын басшылығы серіктестік қызметкерлерін тұрғын үймен қамту, жұмысшылардың жалақысын мүмкіндігінше арттыру, өңірдегі абаттандыру жұмыстарына атсалысу секілді өзге де мәселелерді назарға алып отыр.
«Кейінгі уақытта серіктестікте еңбек ететін қызметкерлерді баспанамен қамтамасыз ету мәселесін шешуге айрықша ден қойдық. Өткен жылы кәсіпорын қызметкерлеріне Қаратау қаласынан 72 пәтердің кілті табысталды. Қоныс тойын тойлағандардың қатарында көпбалалы отбасылар, ардагерлер мен мүгедектер, сондай-ақ «Шолақтау» тау-кен өңдеу кешенінің қызметкерлері бар. Жаңа пәтерге қоныстанған азаматтардың жүзінен шаттықтың лебі айқын аңғарылып тұрды. Бұл азаматтар осыған дейін қажетті тұрғын үймен қамтылмаған. Басшылық тұрғын үй мәселесінен бөлек, балаларға арналған ойын және спорт алаңдары, воркаут аймағы бар жаңа саябақ салғанын айта кеткен ләзім деп ойлаймын. Компания қызметкерлерінің балалары бос уақытын пайдалы өткізуі үшін тұрғын үй жанынан футбол мен баскетбол алаңдары салынды. Осылайша, уақытында иесіз жатқан алқап қазір адам танымастай болып өзгерді. Жарықтандыру жұмыстары жүргізілгеннен кейін аулада отырғызылған ағаштар мен көгалдардың көшеттері адам жанына жайлы атмосфера сыйлап тұр», дейді Ғ.Тоқсанбаев
Жұмысшылар 226 пәтермен қамтылады
Кәсіпорын басшысы келтірген дерекке зер салсақ, жұмысшыларды тұрғын үймен қамтамасыз ету бағдарламасы биыл да қарқынды түрде жүріп жатыр. Жаңатас қаласындағы «Үш Би» тұрғын үй кешенінің құрылысы аяқталғаннан кейін серіктестік қызметкерлері, жас мамандар және аз қамтылған 226 отбасы пәтерлі болмақ. Бүгінде бұл еліміздегі ірі кәсіпорындар арасындағы рекордтық көрсеткіш болып тұр. Тұрғын үй кешеніне тиесілі спорт зал да үздіксіз жұмыс істейді, ал тұрғындардың бос уақытын тиімді пайдалануы үшін жасыл желекпен көмкерілген аллеяға жаңғырту жұмыстары жүргізіледі.
«Ашығын айтсақ, компанияның екі жылда жүргізген жұмыстарының нәтижесінде тұрғын үйге мұқтаж үш жүзден аса отбасының мәселесі оң шешім тауып отыр. Бұл жұмысшыларға көрсетілген үлкен қолдау екеніне ешкім күмән келтіре алмайды. Бұдан бөлек, біз «Отбасы банк» АҚ-мен бірлесіп, компания қызметкерлеріне жеңілдетілген несие мәселесін қарастырып отырмыз. Нәтижесінде, серіктестік қызметкерлері үшін тиімді қарыз беру мәселесі шешімін табады», дейді «Қазфосфат» ЖШС бас директоры.
Компания басшылығы қолға алған жұмыстар мұнымен толастамайды. «Қазфосфат» ЖШС-не қарасты барлық жұмыс істейтін бөлімшелер орналасқан өңірлерді абаттандыру мәселесі де назардан тыс қалған емес. Нақтырақ айтар болсақ, 2021 жылы кәсіпорын жетекшілері Тараз қаласындағы «Үшбұлақ» жағалауын толықтай қалыпқа келтірді. Жағалау бойындағы аумақ абаттандырылып, ағаштар мен көгалдар отырғызылды. Сондай-ақ демалуға ыңғайлы орындықтар орнатылды, балаларға арналған ойын алаңы да уақыт талабына сай жабдықталды. Өзенге қауіпсіз пирс салынғанын да айта кеткен жөн. Сонымен қатар ұзақ жылдар бойы жұмыс істемей тұрған жаяу жүргіншілер көпірін толығымен жөндеді. Мұндағы серуендеуге арналған жасанды аймақ та қала тұрғындарының сүйікті орнына айналды.
Шайқорықта саябақ салынады
Компания басшылары бұған дейін қолға алынған ілкімді істерді одан әрмен қарай сәтімен жалғастыру мәселесін де ойластырып отыр. Өйткені өңірде атқарылатын жұмыстар аз емес.
«Облыс орталығы Тараз қаласының маңындағы Шайқорық ауылынан демалыс саябағын салуды қолға алмақпыз. Тұрғындар бос уақытын текке өткізбеуі керек. Олардың спортпен шұғылдануы үшін мұнда заманауи спорттық құрылғылар орнатылып, қажетті құрал-жабдықтар орналастырылады. Балалар үшін арнайы жеке ойын алаңдары салынатынын да атап өткен жөн. Компания жетекшілері мұндай игілікті бастаманы тек Жамбыл облысында ғана емес, «Қазфосфат» ЖШС бөлімшелері орналасқан басқа өңірлерде де іске асырады. Түркістан облысының Құмкент ауылында кәсіпорын көшелерді жарықтандыру жобасын қаржыландыруды жоспарлап отыр. Мұндай іс-шара ауыл көшелеріндегі қауіпсіздікті қамтамасыз етуге айтарлықтай ықпал ететіні ақиқат. Бұған қоса қамқорлыққа зәру адамдарға, ардагерлерге және балалар үйлеріне көмектесетін қоғамдық ұйымдарды қолдауға ерекше назар аударамыз. Жамбыл облысында қайырымдылық іс-шараларына 2022 жылы 1,2 млрд теңге бөлдік. Мұндай белсенді қайырымдылық жұмыстары алдағы уақытта да жалғасады», дейді Ғ.Тоқсанбаев.
Еліміздегі ең ірі компаниялардың бірі кейінгі жылдары жұмысшыларды тегін тағаммен қамтамасыз ету мәселесін шешті. Қазіргі уақытта тәулігіне 6 мыңға жуық жұмысшы ыстық тамақпен қамтылған. Сондай-ақ Қаратау қаласының маңында орналасқан «Көктал» емдеу-сауықтыру кешенін күрделуі жөндеуден өткізді. Нәтижесінде, емдеу блогі жаңартылып, бес ғимарат жөнделді. Атқарылған жұмыстардың нәтижесінде мұнда демалушылардың саны екі есеге дейін артып отыр.
Бірнеше жылдың бедерінде компания қызметкерлері жалақыны көтеру мәселесін алға тартып жүрген. Қызметкерлердің орынды талабы да компания басшыларының назарынан тыс қалмағаны қуантады. Айтуынша, жұмысшылардың еңбекақысы қаңтар айында 50 мың теңгеге артса, 1 маусымнан бастап тағы 30 мыңға көбейтілмек. Бұл, әрине, қарапайым еңбеккерлер үшін үлкен қолдау екені даусыз. Қызметкерлерге көрсетіліп жатқан өзге де әлеуметтік көмектер жеткілікті. Аз күнде жұмысшылардың балалары демалатын жазғы лагерь іске қосылады.
«Қазфосфат» ЖШС басшылығы бірінші кезекте қызметкерлердің әлеуметтік жағдайын түзетуге айрықша ден қойғаны расымен де көптеген ірі компанияға үлгі десек болады. Бұл бағыттағы жұмыстардың алдағы уақытта назардан тыс қалмайтыны сөзсіз.
Жамбыл облысы
