Өзара мүдделестік танытылған шара

Жақында Қазақстанның Үндістандағы елшісі Дулат Қуанышев  Керала штатының қаржы орталығы – Кочин қаласында Үндістанның ТМД елдерімен сауда-экономикалық қарым-қатынастарын дамыту мәселелері бойынша өткен дөңгелек үстелге қатысты. Аталған іс-шара Үндістанның Сауда, Сыртқы істер министрліктерінің қолдауымен Үндістан Сауда-өнеркәсіп палатасы федерациясы тарапынан ұйымдастырылды.  Іс-шара барысында үнді кәсіп­­керлеріне екіжақты ынты­мақ­­тастықтың жағдайына қатыс­ты мағлұматтар берілді. Мәсе­лен, соңғы үш жылдың ішінде Қазақстан мен Үндістан ара­сындағы сауда көлемі екі есеге артып, оның басқа барлық Орталық Азия елдерімен салыстырғандағы көлемнен де асып түскендігі айтылды. Алайда, қатысқан сарапшылардың пікірлері бойынша, аталған көрсеткіш екі елдің экономикалық әлеуетіне сәй­кес келмейді. Сонымен қатар, Қазақстан мен Үндістан арасындағы сау­да және инвестициялық бай­ла­ныстардың дамуына бас­ты кедергі – екі ел ара­сында қо­лайлы тікелей көлік жол­дарының жоқ екендігі атап көрсе­тілді. Осыған орай, Қазақстанды Иранның Пар­сы шығанағындағы кемежай­ларымен байланыстыратын «Солтүстік-Оңтүстік» халық­­аралық көлік дәлізінің бөлігі болатын теміржол тармақ­тарының маңыздылығы талқы­ланды. Аталған теміржол бағы­тын пайдалану жүк тасымалдау уақыты мен шығынын едәуір қыс­қартатын болады. Қатысушылардың назарына Қазақстанның әлеуметтік-эко­но­микалық жағдайы, мемлекеттік индустриялық-инновациялық да­му бағдарламасының бірінші бес­жылдықтағы негізгі нәтижелері және Үкіметтің 2015-2019 жылдар аралығындағы жобалары туралы ақпарат жеткізіліп, мемлекетіміздің инвестициялық мүмкіншіліктері жайлы бейнематериал ұсынылды. Қазақстанның инвестициялық ахуалын жақсартуға, эконо­ми­каның маңызды секторларындағы инвес­­торлардың қызметін ынта­лан­­дыруға бағытталған заңдағы өзге­ріс­тер аса қызығушылық ту­ғызды. Үндістан кәсіпкерлері Аста­нада өтетін ЭКСПО-2017 шең­беріндегі жобаларды іске асыруға белсенді қатысуға шақырылды, деп хабарлады ҚР СІМ-інің бас­пасөз қызметі.