«Ақниет» ауылға көмектеседі

Былтырдан бері Қызылордада бір игі іс қолға алынған. «Лукойл» мұнай компаниясы өз кәсібін ашып, тірлігін жасағысы келетін адамдарға қайтарымсыз 1 миллион теңге көлемінде несие бере бастады. Жоба «Ақниет» деп аталды. Мұндай бастаманы облыс әкімі Қырымбек Көшербаев көтеріп, мұнай компаниясы аймақ басшысының ұсынысын өмірге ендіргенін айтқан абзал. Өткен жылы кәсіп бастауға ниет білдірген 75 жоба жүзеге асты. Нәтижесін араға жыл салып ұйымдастырылған көрмеден көрдік. Бірі шаштараз, енді бірі наубайхана, балабақша, тігін цехын ашып, ауылға қажетті қызмет түрлерін көрсетіп жатыр екен. Жыл бойы жасаған жұмыстарын кәсіпкерлер осы көрмеде таныстырды. Кәсіпкерлер үлкен қолдау болғанын айтты. Ал, бұрнағы күні «Лукойл Овер­сиз Сервис» мұнай компания­сы қаржыландыратын «Ақниет» әлеуметтік  бағдарламасының 1 миллион теңгеге дейін қайта­рым­сыз несие гранттарының жеңім­паздары анықталды. Бағдарламаның үздік деп таныл­ған 97 жоба иесіне аймақ басшысы Қырымбек Көшербаев пен «Лукойл Оверсиз Сервис» ком­паниясының  қазақстандық филиалының директоры Андрей Кириллов  грант сертификаттарын салтанатты түрде табыстады. – 1 миллион қайтарымсыз грант ауылдық жерде кәсіп бас­тауға үлкен көмек болғаны сөзсіз. Шағын және орта кәсіпкерлікті 5 есе арттыруымыз қажет. Өт­кен жылы өңірге әлеуметтік кәсіпкерлік корпорациясы арқылы 3 миллиард теңге берілді. Биыл тағы 4 миллиард теңге аламыз. Бастысы кәсіпкерлердің жақсы жобалары болса, жүзеге  асыруына қолдау білдіреміз, – деді облыс әкімі. Биыл конкурсқа 1200-ге жуық үміткер өз жобаларын ұсынған. Соның талапқа сай келген 95 жобасына 1 миллион теңгеге дейін қайтарымсыз гранттар беріліп отыр. – Ауыл тұрғындарының бел­сенділігі жоғары. Бір жылдың қорытындысы бойынша жасалған көрмені аралап көрдік. Нәтиженің қандай деңгейде екені анық аңғарылып тұр. Конкурсқа қа­ты­суға ниет білдіргендер көп. Жобалардың  елді мекендерге қа­жеттілігі ескерілді,– деді Ан­дрей Кириллов. «Ақниет» бағдарламасының шеңберінде «Әлеуметтік кәсіпкер», «Жаңалық», «Қо­л­өнер», «Қамқор», «Бастама» және «Игі­лік» деген номинациялар бой­ын­ша байқауға мүмкіндігі шек­теулі жандар, жалғызбасты аналар, көп балалы және тұрмысы төмен отбасылар қатысқанын айта кетейік. Ержан БАЙТІЛЕС, «Егемен Қазақстан». Қызылорда облысы.