«Ана жүрегі» акциясында аурухана мамандары балаларға концерттік бағдарлама ұйымдастырып, көңілін ауласа, өзге дәрігерлер аналарды медициналық тексеруден өткізді. Әрі акцияға осы емханаға қарайтын пациенттер ғана емес, Астана қаласы бойынша ерекше баланы алақанына салып отырған аналар жиылған. Бұл күні келіншектер амбулаториялық тексеруден өтсе, кейбірі лабороториялық зерттеулерге барды. Акцияға 2013 жылы небәрі 17 ана қатысса, осы жолы бір күнде 50 ана келіпті. Аурухана басшылығы акция басталғалы қолдан келгенше жәрдемдесуге ниет білдірген қайырымды жандардың көп болғанын айтты. Демеушілер әркез балаларға сый-сияпатын әкеліп тұрады екен.
– «Ана жүрегі» акциясы осымен оныншы жыл қатарынан бізде ұйымдастырылды. Бүгін де әдеттегіше аналар тексеруден өтіп жатқанда балғындар психолог, әлеуметтік қызметкерлердің бақылауында болды. Біз медициналық мекеме болған соң, біздің ең басты жұмысымыз – әрине, тұрғындардың денсаулығын бақылау. Өкінішке қарай, әдетте ерекше баланың қас-қабағына қарап отырған аналар үйінен еркін шыға алмайды. Ерекше балаға ерекше күтім керек қой. Міне, сондықтан біз осындай іс-шараны жылына екі мәрте ұйымдастырып, аналарды тексеруден өткіземіз, – дейді №6 қалалық аурухананың директоры Динара Байсеркина.
Акцияға бірінші рет келіп отырған қала тұрғыны Ботагөз Ақманова қолдан келсе, осындай іс-шаралардан қалмайтынын айтты.
– Әне-міне дегенше балам да 16 жасқа келіпті. Денсаулығына қарай бірінші топта. Ақыл-есі дамыған. Қазір сегізінші сыныпта оқиды. Ем алып, оңалтудан өтіп жатыр. Акцияға бізді бүгін мүгедектігі бар балалар бірлестігі шақырды. Біз, әрине, бір күнде толық тексеруден өтіп, кезексіз барлық сараптаманы қолға алғанымызға қуаныштымыз. Реті келсе, келер жолы да келерміз. Өйткені ерекше балаға қамқор аналардың бірінші кезекте өзі ауырмауы керек, – дейді ол.
Сонымен акцияға жиылған қауым ана мен балаға арналған іс-шаралар жиірек ұйымдастырылса, қалыс қалмауға тырысатынын айтып тарқасты.
