«Қазақстан Республикасының Мемлекеттік рәміздері туралы» Конституциялық Заң 2007 жылдың 4 маусымында қабылданды. Осы заңға сәйкес жыл сайын рәміздер күні 4 маусымда атап өтіледі.
Қазақстан Республикасының рәміздері – ту, елтаңба, әнұран.
Әрбір рәміз - қастерлі құндылық. Рәміздердергі әр символдың өз мәні бар. Мәселен, туда бейнеленген қыран еркіндікті, күн молшылық пен байлықты, көк түс береке, тыныштық бірлікті білдіреді. Мемлекеттік туымыз 1200 нұсқаның ішінен таңдалған.
Қазақстан Республикасы Мемлекеттік туының авторы – Қазақстанның еңбек сіңірген өнер қайраткері Шәкен Ниязбеков.
Еліміздің елтаңбасында ұлтымыздың тарихы мен мәдениеті көрініс тапқан. Қазақстан Республикасы Мемлекеттік елтаңбасының авторлары – белгілі сәулетшілер Жандарбек Мәлібеков пен Шот-Аман Уәлиханов.
Асқан шеберлікпен жасалған елтаңба 293 жобаның ішінен үздік деп танылған.
Елтаңба авторы Жандарбек Мәлібеков елтаңбаның философиялық мәні туралы былай дейді: «Біздің мөрімізде халқымыздың ата-бабалары – сақ, ғұн, түрік, қыпшақтан бастау алатын қанша мың жылдан аса тарихы мен мәдениетін көрсетуді көздедім. Осы мақсат миымның бір түкпірінен орын алып, шықпай қойғанда қазақтың күнделікті тұрмыста айтылатын «Шаңырағың биік, босағаң берік, керегең кең болсын!» деген тілектер санамда қайта жаңғырды».
Автор елтаңбаны Өзбекстанда жүргенде жасаған.
«Елтаңба – Отаныма деген сағынышымның жемісі, шеттегі қарадомалақтың терең тарихы, жоғары мәдениеті, өлмейтін рухы, тәрбие тұнған салт-дәстүрі, бай өнері сақталған егемен елінің бар екеніне деген мақтанышының, осының бәрін мойындамағандарға өз кәсібімен көрсеткісі келген сәулетші еңбегінің нәтижесі. Бұған қоса туған жерден жырақта жүрген жанға тәуелсіз мемлекетінің іргетасын қалауға атсалысу, осындай тарихи жолда қолтаңбасы мен өз ізін қалдыру – ештеңемен алмастырмайтын асқақ абырой, қасиетті қызмет», дейді Жандарбек Мәлібеков «Egemen Qazaqstan» газетіне берген сұхбатында.
ҚР Мемлекеттік әнұраны 2006 жылдың 7 қаңтарында Парламентте бекітілген. Сондай-ақ ол алғаш рет тұңғыш Президентті ұлықтау рәсімінде орындалған.
Заң бойынша (ҚР Қазақстан Республикасының мемлекеттік рәміздері туралы заңының 9-бап, 1-тармағы) Мемлекеттік әнұран шырқалған кезде оны орнынан тұрып айту және оң қолын жүрек тұсына қою міндеттеледі.
Әннің авторы - Шәмші Қалдаяқов, сөзін жазғандар - Жұмекен Нәжімеденов, Нұрсұлтан Назарбаев.
