ҰБТ басталғалы шекті балды 78 пайызға жуық талапкер жинаған. Орташа балл әзірше 69 ұпайды құрады. Ең жоғары балл – 137, оны тестілеудің бірінші аптасында бір талапкер жинаған.
– ҰБТ-ның үшінші аптасында талапкерлер тестілеуді тапсырудың екінші мүмкіндігін пайдаланды. Сондықтан тестті екі рет тапсырып, ұпайларын біліп отырған балалар грант конкурсы туралы сұрақтар қоя бастады. Ең жиі қойылатын сұрақ: Грант ұтып алу үшін қанша балл жинау керек? Грантқа шекті балл деген болмайды, барлығы конкурсқа байланысты екенін тағы да атап өткен абзал. Бірақ кем дегенде бағдар болу үшін оқуға түсушілер былтырғы нәтижелермен таныса алады. Мысалы, 2022 жылы «Стоматология» білім беру тобы бойынша бір гранттық орынға 25 үміткер болған, ал грант ұтып алғандардың орташа көрсеткіші 134 балды құрады, – деді Ұлттық тестілеу орталығының директоры Руслан Емелбаев.
Айта кетейік, ерекше қажеттіліктері бар оқуға түсушілер үшін қолайлы жағдай жасаудың нәтижесінде ҰБТ-ға екі аптаның ішінде 370 талапкер қатысты.
Бүгінгі таңда 146 талапкер смартфон, шпаргалка және басқа да тыйым салынған заттарды алып өту әрекеті салдарынан тест тапсыру мүмкіндігінен айырылды. Тестілеу кезінде ережелерді бұзғаны үшін аудиториядан 106 адам шығарылып, олардың нәтижелері жойылды. Бөгде тұлғалар анықталған жоқ.
Айта кетейік, 2023 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбаларына талдау жүргізіледі. Тыйым салынған заттарды пайдалану немесе ережелерді бұзу фактілері анықталған жағдайда талапкердің нәтижелері жойылады.
