Үш күнге жалғасқан әлем чемпионатында Қазақстан ұлттық құрамасының спортшылары екі бағдарлама қорытындысы бойынша 61 медаль олжалап (21 алтын, 19 күміс және 21 қола), жалпыкомандалық есепте бас жүлдеге ие болды. Екі спортшы арасындағы жекпе-жек түрінде ерлер – 8, әйелдер – 6 және 2 абсолютті салмақта күш сынасты. Бұдан бөлек, өзін-өзі қорғау бағдарламасында ерлер – 11, әйелдер 8 салмақта кім мықтыны анықтады. Тағы бір айта кетерлігі, жарыс қожайыны ретінде ең көп спортшыны (65 адам) Қазақстан құрамасы қосты.
Сонымен қатар 7 алтын, 7 күміс және 15 қола медальді қоржындарына салған Ресей құрамасы жалпыкомандалық есепте екінші орынға ие болса, үздік үштікті Өзбекстан спортшылары түйіндеді. Олардың еншісінде 25 жүлде бар (7 алтын, 6 күміс, 12 қола). Кейінгі орындарға Молдова (1 күміс, 1 қола), Қырғызстан (6 қола) мен Таиланд (3 қола) құрамалары жайғасты.
Жарыстың жабылу салтанатында Мәдениет және спорт министрі Асхат Оралов, Мемлекеттік күзет қызметінің басшысы, Қазақстан қоян-қолтық ұрыс қауымдастығының президенті, генарал-майор Сәкен Исабеков, Халықаралық қоян-қолтық ұрыс федерациясының президенті Сергей Астахов қатысып, жүлдегерлерді марапаттады.
«Бүгінде еліміз бойынша қоян-қолтық ұрыстың 500-ге жуық секциясы жұмыс істейді, онда 22 мыңнан астам адам осы спортпен шұғылданады. Жекпе-жек түрлері Қазақстанда өте танымал, сондықтан бұл спорт түрінің елімізде болашағы зор деп білемін. Халықаралық қоян-қолтық ұрыс федерациясына, сондай-ақ бүкілқазақстандық қоян-қолтық ұрыс қауымдастығына және оның президенті – Мемлекеттік күзет қызметінің бастығы, генерал-майор Сәкен Исабековке айрықша алғыс айтқым келеді. Мұндай турнирлердің спорт пен саламатты өмір салтын насихаттауға қосатын үлесі орасан зор, сондықтан біз осындай жарыстарды елімізде мүмкіндігінше жүйелі түрде өткізу үшін жұмыс істейміз», деді А.Оралов.
Жалпы, қоян-қолтық ұрыс – күш қолданатын бірнеше спорт түрінің қосындысынан шыққан. Жекпе-жек түрінде екі спортшы бір-бірімен күш сынасса, өзін-өзі қорғауда жекелей және жұптық сында шабуылдан қалай қорғану керегі көрсетіледі. Мұнда әр жаттығу 5 қорғаныс әдісінен топтастырылған.
