Кәсіби мансабында «Тараз», «Астана», «Шахтер» секілді өзге де бірнеше клубтың жейдесін киген саңлақ футболшы бүгінде медиа лига командаларының бірінде бақ сынап жүр. Жасыл алаңда жанкүйерлерді шеберлігімен тәнті еткен Ұлан Тараз қаласының балаларына тамаша тарту жасады.
«Қаратау» шағын ауданының балалары енді «Ұлан Арена» алаңында доп тебеді. Шағын ауданға қарасты №29, №30 үйдің ауласынан ашылған алаң жергілікті балаларға зор қуаныш сыйлады. Жаңа футбол алаңының ашылу салтанатына қатысқан жасөспірімдер Ұлан Қонысбаев секілді белгілі футболшы атану үшін тер төгеміз деп отыр.
Жерлесіміз тарту еткен «Ұлан Арена» футбол алаңының ашылу салтанатына Тараз қаласы әкімінің орынбасары Дәуір Дәулетов қатысып, футболшыға, оның әкесі Әбиірбек Қонысбаевқа шаһар тұрғындарының ризашылығын жеткізді.
Іс-шара барысында аула тұрғындары да әйгілі футболшыға ақжарма тілектерін жеткізіп, бұрыш-бұрышта доп теуіп жүрген балаларына қамқорлық жасағаны үшін алғыс айтты. Жаңа алаңның ашылу салтанатында Ұлан Қонысбаевтың өмір жолынан, кәсіби мансабынан сыр шертетін «Футбол және мен» кітабының таныстырылымы ұйымдастырылды.
ТАРАЗ
