Польша – Орталық және Шығыс Еуропа елдері арасында Қазақстанның жетекші сыртқы экономикалық әріптестерінің бірі. 2022 жылы өзара сауда көлемі – 1,36 млрд доллар, оның ішінде қазақстандық экспорт – 771 млн, Польшадан импорт 587,5 млн долларды құраған. Польшадан ел экономикасына тікелей инвестициялардың жалпы ағыны – 75 млн доллар. Бүгінде Қазақстанда 100-ден астам поляк компаниясы жұмыс істейді.
Форумның мақсаты – Қазақстан мен Польша арасындағы сауда-экономикалық, инвестициялық ынтымақтастықты жандандыру, екі елдің іскер серіктестері арасында қолданыстағы және жаңа тікелей байланыстарды нығайту. Шара аясында біздің делегация поляк компанияларымен бірқатар екіжақты кездесулер өткізді. Польшаның өнеркәсіптік даму агенттігімен кездесу барысында метал-
лургия, тау-кен және машина жасау өнеркәсібі, тоқыма өндірісіндегі ынтымақтастық мәселелері талқыланды.
Польшаның өнеркәсіптік даму агенттігі – 100 пайыз мемлекеттік басқарушы холдинг және өнеркәсіпті дамыту институты. Компания елдің негізгі өнеркәсіптік кәсіпорындарының акцияларын басқарады (90-нан астам ірі поляк өнеркәсіптік компаниялары).
Форум барысында әсіресе, машина жасау саласы кеңірек талқыланды. «Сауда және өнеркәсіп секторындағы ынтымақтастық әлеуеті» панельдік сессиясы аясында Қазақстан машина жасаушылар одағының басқарма төрағасы Мейрам Пішембаев отандық машина жасау саласының дамуы туралы айтып берді.
«2022 жылдың қорытындысы бойынша саладағы өндіріс көлемі 9 пайызға ұлғайды. Негізгі капиталға салынған инвестициялар 10 пайызға өсіп, 258 млн долларды құрады. Машина жасау өнімінің экспорты 2 есе артып, ақшалай мәнде 3,8 млрд доллар болды», деді М.Пішембаев.
Бұдан бөлек, отандық IT-компаниялар мен ұйымдар үшін сybersecurity, fintech, biotech, medtech, agrotech, software, deep tech, robotic, gaming, AI салаларында поляк серіктестерімен B2B кездесулер ұйымдастырылды, сондай-ақ инвесторлар алдында IT және High tech жобаларын таныстыру және воркшоптар мен ақпараттық сессияларға қатысу мүмкіндігі берілді.
