Спортты дамыту дирекциясының мәліметі бойынша спартакиаданың соңғы күнінде жанкүйерлер әр спорт түрінің финалдық бәсекелерін тамашалады. Шағын футбол бойынша финалдық сайыста Астана қаласының командасынан басым түскен Қостанай облысының құрамасы жеңіске жетсе, волейбол жарысында түркістандықтар жеңімпаз атанды. Шешуші ойында олар БҚО командасынан басым түсті. Сонымен қатар Түркістан облысының мемлекеттік қызметкерлері үстел теннисінде де қарсылас шақ келтірмеді.
Қазақ күресі бойынша Атырау облысының апайтөс балуандары мықтылық танытса, тоғызқұмалақта Ақтөбе облысының өкілдері бас жүлдеге ие болды. Бильярдта шымкенттік тастаяқшылардың шеберлігі үстем болса, суда жүзуде Қарағанды облысының спортшылары басымдық танытты.
Спартакиада қорытындысы бойынша ең көп ұпай жинаған Түркістан облысының құрамасы жалпыкомандалық есепте топ жарды. Сонымен қатар Батыс Қазақстан облысы – екінші, Павлодар облысы үшінші орынды иеленді.
