Оныншы мәрте ұйымдастырылып жатқан әлем біріншілігі Өзбекстан астанасында 14 қыркүйек пен 6 қазан аралығында өтеді деп жоспарланған. Жаһандық доп додасына алты құрлықтың 24 құрамасы қатысады. Бір айта кетерлігі, футзалдан 2024 жылғы әлем чемпионаты Азия аймағындағы төртінші, Өзбекстандағы алғашқы турнир болмақ.
Сары құрлықтағы бұған дейінгі біріншіліктер 1992 жылы Гонконгте, 2004 жылы Тайванда және 2012 жылы Таиландта ұйымдастырылған. 2021 жылы Литвада өткен ең соңғы әлем чемпионатында Португалия құрамасы чемпион атанса, Қазақстан футзалшылары үшінші орын үшін өткен бәсекеде Бразилияға жол беріп, төртінші сатыға табан тіреген еді.
