Медицина • 05 Шілде, 2023

Медициналық туризм орталығының мүмкіндігі

278 рет
көрсетілді
5 мин
оқу үшін

Елордада қала күні ме­рекесі қарсаңында «Аста­наның 25 жылдығы: Ас­тана – болашақ қаласы» атты форум өтіп, оның аясында «Медицина­лық туризм» панелдік сес­сиясы ұйымдастырыл­ды. Оған медициналық туризмнің жаһандық на­рығын дамытуға атсалысып жүрген білікті са­рапшылар қатысты. Қа­тысушылар Қытай, Түр­кия, Өзбекстан, Израиль, Әзербайжан, Ресей және Беларусь елдерінен келді. Сондай-ақ қатысушылар арасында республикалық жетекші медициналық ұйымдар, оның ішінде JCI (Joint Commission International) халықаралық сапа сертификатымен аккредиттелген мекемелер бар.

Медициналық туризм орталығының мүмкіндігі

Сессия аясында Қазақстанда­ғы медициналық туризмнің қазір­гі ахуалы, оның даму перспективасы мен проблемалары және аталған бағыттағы көшбасшы елдердің тәжірибесі талқыланды. Қазақстан медициналық туризм қауымдастығының президенті Кристина Кривецтің айтуынша, «University Medical Center» (UMC) Корпоративті қоры аясында Астанада медициналық туризм кластері құрылды.

«Оған JCI аккредитациясынан өткен клиникалар енді. Айта кетейін, JCI – АҚШ-та әзірлен­ген, денсаулық сақтау сапасы­ның жоғарғы деңгейін растайтын стандарт. Қазір Астанадағы медициналық туризм картинасы айтарлықтай өзгерді. Бұрын бізге негізінен Қырғызстан, Өз­бек­станнан адамдар ем алуға кел­се, қазір емделушілер Ресей­ден де келе бастады. Алыс ше­тел­дерден стоматология және ре­продуктивті медицина қыз­мет­терін пайдаланғысы келген аза­маттар ат басын бұрады. Бізге келіп ем қабылдап жатқан елдер қатарында Швейцария, АҚШ, Біріккен Араб Әмірліктері, Аустралия және Африка елдері бар», дейді К.Кривец.

Оның мәлімдеуінше, JCI бо­йынша аккредитация – айтар­лық­тай қымбат процедура. Ме­ди­циналық мекемеде барлық халық­аралық талапқа сай келетін қызметті көрсете алатындай бюджет болуға тиіс.

«Шетелдік емделушілер тек ем үшін ғана емес, сонымен бір­ге жайлы жағдай, күшті сер­вис үшін де келеді. Олар қауіп­сіздік пен сапа стандартта­рына сай келетін, сонымен қатар ағылшын тілінде қызмет көрсетілетін мем­лекеттік және жеке клиникаларды таңдайды. Астананың ме­дициналық кластерінде кар­дио­хирургия, нейрохирургия, репродуктивті медицина, ба­ла­ларды сауықтыру сияқты ба­ғыттар жақсы дамыған. Сондай-ақ мемлекеттік секторға қатыссыз стоматология және пластикалық хирургия бағытын да атап өткен жөн», деді ол.

Жалпы, 2022 жылы елімізге 5 мың адам ем алу үшін және диагностикадан өту үшін келген. Биыл шамамен 8 мың адам келеді деп күтіліп отыр.

«Егер біз нейрохирургия ту­ралы айтар болсақ, бірінші болып «Vanadis» технологиясы – Ор­талық Азиядағы жалғыз гам­ма-пышақ ауызға ілігеді. Бұл дегеніміз – инвазивті емес пренаталды скрининг, ол жерде аналар плацентаны теспей-ақ генетикалық ауытқулардың бар-жоғын анықтай алады. Ал диагнос­тика, қызмет құны ту­ралы айтар болсақ, онда Ре­сейге қарағанда 1,5 есе төмен баға­да қыз­мет көрсете аламыз. Германия, Израильмен салыс­тырғанда бізде диагностикадан өту, емделу 3 есе арзанға шы­ғады», деді К.Кривец.

Жалпы алғанда, мамандар Астананың медициналық туризм орталығына айналып келе жатқанын және оған толыққанды мүмкіндігі бар екенін де айта­ды. Қазір бас шаһарда жет­кі­лікті әлеует бар – жоғары тех­но­логиялық құрылғылармен жаб­дықталған, халықаралық стан­дарттарға сай, бағасы қолжетімді, қызмет спектрі ауқымды және қызмет көрсету деңгейі жоғары клиникалар саны көбейіп келеді.

«Қазақстан әрқашан біздің ма­ңызды серіктесіміз болды. Ме­­ніңше, мұның бір себебі ха­лық­­тың осында сапалы медици­налық көмек алуы және соның нәтижесінде медициналық турис­терді тарту үшін мемлекет тарапынан кадрларға инвестиция құюы деп ойлаймын. Мұнда мамандар Еуропадан, тіпті Америкадан келіп жатыр. Неге, себебі – мұн­да айтарлықтай арзан, оның үстіне медицина түсінікті, белгілі, JCI аккредитациясы бар, бұл – ең маңызды әлемдік аккредитация. Сондықтан Қазақстанның медициналық туризм орталығы атанбауына ешқандай кедергі келтірерлік себеп жоқ», деп пікірін білдірді Израильдегі ме­дициналық орталықтың бас директоры Наталья Мелех.

Қазір елімізде JCI стандартымен жұмыс істейтін 9 клиника бар. Тек соның біреуі ғана – жекеменшік. К.Кривецтің айтуын­ша, қазір отандық медицинаға жақсы промоушен жетіспей тұр. Алдағы уақытта қауымдастық медициналық ұйымдармен ті­зе қосып жұмыс істеп, елдегі медициналық қызмет сапасын одан әрі арттыруға, ақпаратты мей­лінше кеңінен таратып, шет­елдіктердің де сенімін оятуға күш салмақ.