Музей • 12 Шілде, 2023

Роботтар музейі

263 рет
көрсетілді
1 мин
оқу үшін

Қарапайым заттардан, тұрмыстық техника қалдықтарынан роботтар жасап танылған талғарлық стоматологті біреу білсе, біреу білмес. Оның ендігі мақсаты – шеберхана салып, өзгелерге темірмен жұмыс істеуді үйрету.

Роботтар музейі

Шаңсорғыштан робот, кір жуа­тын машинадан ұшқыш және көлік бөлшектерінен терминатор құрас­тырған тіс дәрігері осы күнге дейін 40-тан аса мүсін жасапты. Бүгінде Қуаныш Мұхамеджановтың үйіндегі мұражайына келушілер саны артып, Талғар қаласындағы қызықты нысанның біріне айналған. Тіпті шетелдік турис­тер де ат басын бұрып тұрады.

– Кейінгі бір жылда 10 мүсін жаса­­дым. Олардың арасында екі горилла, Оптимус Прайм және Айдаһар бар. Көпке танымал Валли робот­­тың да көшірмесін жасадым. Олар­дың барлығы тұрмыстық темір қалдықтарынан құрастырылған. Қазір пластик қалдықтармен жұмыс істеп жатырмын, – дейді арт-мүсінші Қуаныш Мұхамеджанов.

Шебер үнемі шеберлігін шыңдап, шетелдік әріптестерімен тәжірибе алмасып отырады. Болашақта бұрын­ғыдан да күрделі мүсіндер жасап, шетелдік шеберлермен ортақ жобаны қолға алмақ. Мәселен, музейдегі үлкен горилланы біраз жыл бұрын британдық мүсінші көліктің бамперінен құрастырыпты. Ал талғарлық шебер тұрмыстық пластикалық қалдықтардан жасаған. Горилла жобасы осылай басталған. Олардың салмағы 300 кило және тек қайта өңделген пластиктен құрастырылады. Экс-стоматологтің ендігі мақсаты – мұражай аумағын ұлғайтып, мүсіндер түрін көбейту. Оған қоса балаларға арналған кейіпкерлерден ересектерге арналған мүсіндер құрас­тыруға ниеттеніп отыр.