Алдымен ауыл-аймақтан жиылған кәсіп иелері тауарларын сөреге қойып, тұрғындарға оның мән-мазмұнын түсіндірді. Байқауға түрлі салада еңбек ететін 30 шақты отандық тауар өндіруші қатысты. Ал «Бір ауыл – бір өнім» ұлттық жобасында тағы 50-ге жуық кәсіпкер өнімдерін көпшілік назарына ұсынды. Облыс әкімі Бейбіт Исабаев бастаған топ әуелі байқауға қатысушылардың көрмесін тамашалап, ұсынылған өнім түрлерінің сапасына мән берді.
Көрме сөрелеріндегі құрылыс бұйымдары мен ауыл шаруашылығы және электротехникалық өнімдер, медициналық құрал-жабдықтар мен тұрмыстық жиһаздар, зергерлік бұйымдар, киім-кешек пен аяқкиімдер, ет, сүт, ұн сияқты азық-түлік өнімдері, ұлттық тағам түрлері, тағы басқалары жиналғандардың таңданысын туғызып, таң-тамаша етті. Көрме кезінде қонақтар тауарлар мен қызмет түрімен танысып қана қоймай, өнімдерді өз бағасында сатып алу мүмкіндігіне ие болды. Жүн, тері бұйымдары да жиналғандардың жоғары бағасын алды.
Мәселен, Көксу ауданы Балпық би ауылының тұрғыны жас кәсіпкер Бағдат Сатыбалдының табиғи теріден жасалған күз, қыс, көктем мезгілдерінде киетін аяқ киімдері көпшілікті өзіне қаратты. Кәсіпкердің айтуынша, өндіріс орны осыдан 7 жыл бұрын құрылған. Ол кәсібін аяқ киімдерді жөндеуден бастап, кейіннен аяқкиім тігуді үйреніп, өнерін ұштаған. Бұйым жасауға қажет тері Текелі, Шымкент қалаларынан жеткізіледі, яғни шикізаттың басым бөлігі отандық өнім болып табылады. Қолдан тігілген бұйымдар, әсіресе маусым кезінде жақсы өтіп, тауарға сұраныс артады. Сатып алушылар аймақтың әр түкпірінен келеді. Әуелі шет елден де тапсырыс түседі. «Бағдат» жеке кәсіпкерлігінің иесі бүгінде 5 адамды жұмыспен қамтып отыр.
Жиын барысында облыс әкімі елімізде кәсіпкерлікті дамыту негізгі міндеттердің біріне айналғанын жеткізді.
«Шағын және орта бизнесті өрістету қала мен даланы өркендетуге жол ашады және жергілікті жұртшылықты жұмыспен қамтуға мүмкіндік береді. Бүгінде кәсіппен айналысам деушілер үшін мемлекет тарапынан көрсетіліп жатқан көмектер аз емес. Жаңа идеяны жүзеге асыруға ұсыныс тастаған адамдарға билік тарапынан әрдайым қолдау көрсетіледі. Сондай-ақ қазірдің өзінде біраз елге әйгілі болып, брендке айналған Лепсі балы – Жетісу аймағы үшін үлкен мақтаныш», деді Б.Исабаев.
Одан кейін әкім кәсіпкерлік, шағын және орта бизнес, ауыл шаруашылығы саласындағы жұмыстарға да қысқаша тоқталып, соңынан кәсіпкерлер ісіне сәттілік тіледі.
Көп ұзамай үздік кәсіпорындар анықталып, жетекшілеріне барынша сый-құрмет көрсетілді. Облыс әкімі Бейбіт Исабаев жеңімпаздарды бағалы сыйлықтар және арнайы дипломдармен марапаттап, жүрекжарды жылы лебізін арнады. Байқау қорытындысына сәйкес, «Өндірістік мақсаттағы үздік тауарлар» аталымында Кербұлақ ауданындағы цемент шығаратын «Алацем» ЖШС 1-орынға ие болса, құрылысқа қажет бояу түрлерін өндіретін «Алматы бояулары» ЖШС – 2-орын , 3-орын «Уыз май Industry»» ЖШС-ға бұйырды.
Ал «Үздік азық-түлік тауарлары» аталымы бойынша сүт өнімдерін өндіріп, өткізетін Талдықорған қаласындағы «JLC Сүт» ЖШС үздіктердің қатарынан табылып, Алакөл ауданындағы бал түрлерін шығаратын «Лепсі өнімдері» ЖШС 2-орынға ие болды. Аспаздық және кондитерлік өнімдерді өндіруге маманданған Талдықорған қаласындағы «Хакимова» ЖК 3-орынға шығып, жиналғандардың қошеметіне бөленді.
«Халық тұтынатын үздік тауарлар» аталымында Панфилов ауданынан балалар төсемдері мен гигиеналық құралдарды өндірумен айналысатын «Elite Baby Production» ЖШС 1-орын алса, 2-орын Көксу ауданында құрылыс материалдарын өндіретін «Строитель» ЖШС бұйырды. Ал жүннен тұрмыстық бұйымдар жасайтын «Келгембаева Ж.К.» ЖК 3-орынға қол жеткізді.
Іс-шараның келесі кезеңінде «Бір ауыл – бір өнім» ұлттық жобасының қорытындысы шығарылды. Облыстық Іскер әйелдер кеңесінің төрағасы Римма Салықова: «Жоба ауылдағы бизнесті дамытуға бағытталған. Ауылды жерлерде де кәсіпті өркендетіп, сапалы өнім өндіріп, келешекте экспортқа шығаратындай табыс табуға болады. Бұл шарада үздік 10 өндіруші таңдалды. Олардың 3-еуі осы жобаның республикалық кезеңіне қатысады. Кейіннен олармен өнімдерін ішкі және сыртқы нарықтарда ілгерілету үшін жұмыс жүргізіледі. Маркетингтік және әдіснамалық сүйемелдеу, сондай-ақ менторлық және оқыту жүзеге асырылады. Жапониядан келген жоба серіктестер қолдау көрсетеді», деді Р.Садықова.
Ендігі кезекте жеңімпаздар облыс атынан Астана төрінде өтетін республикалық «Қазақстанның үздік тауары» көрме-байқауына қатысады.
