![Иппотерапия игілігі](/media/2023/07/31/ippoterapiya-2.jpg)
Мұнда ерекше балалар аптасына 3 мәрте келіп, иппотерапия емін қабылдайды. Курс жарты сағатқа созылады. Білікті, сертификаты бар мамандардың нұсқауымен балалар ат үстінде түрлі қимыл-қозғалыс жасайды.
«Иппотерапия емі балаға психоэмоционалдық және биомеханикалық тұрғыдан жақсы әсер етеді. Атқа мініп, серуендеу – жарымжан бала үшін үлкен жетістік. Жылқы жүрісінің тербелісі баланың тірек-қозғалыс жүйесіне оң әсер етеді. Мұны мамандар растайды. Ата-анасының немесе нұсқаушының көмегімен атпен серуендету арқылы мүмкіндігі шектеулі балалардың аяқ-қол моторикасын дамытуға, ат үстінде тепе-теңдікті сақтау арқылы олардың қимыл-қозғалыс үйлесімін түзетуге болады. Бізге келіп жүрген балалар алғашқыдағыдай емес, қазір ширап қалды. Бұл церебралды сал ауруын, аутизм, моторлық және сөйлеу әрекеттерін жақсартады, сөйлеу белсенділігін арттырады», дейді иппотерапия бойынша нұсқаушы Мөлдір Расулова.
Айта кетейік, Мөлдірдің осы бағытта жұмыс істеп жүргеніне 8 жылға жуықтапты. Ол 9 айлық баланы да иппотерапия еміне әкелгендер бар екенін айтты. Мұны маман құптап отыр. Баланың белгілі бір жасқа толып, диагнозы анықталуын күтіп отырғанша, алғашқы белгілерін байқасаңыз, бірден жылқы үстінде жаттығу жасату керек екеніне кеңес береді. Сонымен қатар Мөлдір паралимпиадалық ат спортын дамытып жүрген жас маман ретінде аймаққа белгілі. «Қабілетті балаларды байқасақ, ат спортына баулып, нәтиже шығарамыз», дейді ол.
Дәмила Түсіпова екі баласын да иппотерапия сабағына апарады. 11 жастағы Айшабибі есімді қызынан церебралды сал ауруы, ал 10 жастағы Керімнен туа біткен аутизм диагнозы анықталған.
«Наурыз айынан бастап иппотерапиямен айналысамыз. Балаларым мазасыз болатын. Қазір оң нәтиже байқалады. Балалар сабырлы бола түсті. Қызымның түзу отыруы қиындық тудыратын. Міне, бес ай өтті, сабақтан қалмаймыз, соның нәтижесінде тепе-теңдікті, түзу отыруды үйренді. Ұлым түнде мазасызданып, әрең ұйықтайтын. Қазір ұйқысы тынышталды. Осындай мүмкіндік сыйлаған жандарға ерекше алғыс айтамыз. Балаларым осында келеміз десек, қатты қуанады. Жылқыны жақсы көреді. Мұнда инватаксидің көмегімен тегін қатынап тұрамыз. Бір күн бұрын тапсырыс береміз. Бұл да үлкен көмек болып тұр», дейді Д.Түсіпова.
Сіз де балаңыздың иппотерапия емін қабылдағанын қаласаңыз, онда жолы оп-оңай. Тек төмендегідей құжаттар толық болса болды.
«Иппотерапия қызметін қажет етсеңіздер, Қарағанды қаласының жұмыспен қамту және әлеуметтік бағдарламалар бөліміне өтініш, баланың туу туралы куәлігі, мүмкіндігі шектеулі екенін айғақтайтын анықтама және балаға иппотерапиямен айналысу қажеттігі туралы дәрігерлердің сараптамасы қажет. Егер өтініш көбейіп, балалар саны арта түссе, қосымша қаражат қарастырылады», дейді Қарағанды қаласының жұмыспен қамту және әлеуметтік бағдарламалар бөлімінің сектор меңгерушісі Гүлжан Шаймарданова.
«Карат» жылқы зауытында иппотерапия емін жүргізетін сертификаты бар төрт жаттықтырушы қызмет көрсетеді. Алаңдамаңыз, балалардың қауіпсіздігі қатаң сақталады. Бір балаға үш маман қызмет көрсетеді. Бұған қоса арнайы иппотерапия үшін жуас үш жылқы таңдалып алынған.
Ат үстінде отырған адамның барлық бұлшық еті қозғалыста болады. Тепе-теңдікті сақтау үшін салт мінген адам бойын жинауға, өзінің әрбір дене қимылын игеруге жаттығады. Ал ерекше балаларға ең керегі де осы жаттығу. Бір сөзбен айтқанда, жылқы – табиғи тренажер.
Қасымхан ҒАЛЫМ,
«Egemen Qazaqstan»