Көксу ауданында әкіммен серуен акциясы өтіп жатыр. Көксулықтар аудан басшысы Марлен Көлбаевпен бірге таңбозынан жаттығу жасап, түрлі іс-шараға қатысып келеді.
Көрсе көңіл шалқитын Көксу ауданының тұрғындары жаздың әр күнін аудан әкімімен бірге өткізіп жүр. Ертемен аудан стадионына жиналған ардагерлер мен спортшылар, одан бөлек оқушылар мен жасөспірімдер М.Көлбаевпен бірге бірнеше шақырым жол жүреді. Бұл саламатты өмір салтын сақтауда таптырмас әдіс екені анық.
«Аудан басшысының бұл игілікті ісі тұрғындардың ыстық ықыласына ие болды. Әрі жастарға үлкен мотивация. Бірінен бірі өтетін іс-шаралар ұйымдастырып келеді. Халық та бір уақыт рухани демалып, көңілдері көтеріліп қалды», дейді Алматыдан қонаққа келген Әсия Арманқызы.
Халықтың бос уақытын тиімді ұйымдастыру мақсатында Мәдениет үйінің алдында отандық және шетелдің үздік фильмдер мен мультфильмдер үздіксіз көрсетіліп отыр. Қоңыр түннің самалымен ашық аспан астында үлкен экраннан кино көрген көксулық жастардың көңілі шат. Сол маңға жиналған жетісулықтарға тегін қарбыз бен балмұздақ ұсынылып, арнайы викториналар ойнатылады. Тіпті сыйлықтар да табысталады. Содан соң би кеші басталады.
Әр аптаның дүйсенбі, сәрсенбі және жұма күндері Б.Оңғаров атындағы орталық стадионда әкіммен кешкі серуендеуіңізге болады. Бұл іс-шара айдың аяғына дейін жалғасын таппақ. Қатысушыларға толық 10 000 қадам жүргенше тоқтау жоқ, әкіммен кез келген тақырыпта әңгімелесуге болады.
