«Сауықтыру орталығын ашқаннан бері осы мекемеге басшылық жасап келемін. Әрине, алғашқы кезде талай қиыншылықтар кездесті, бұрын балалар демалған корпустарды жөндеу, кем-кетігін түзеуге қаржы таптық. Сенбі, жексенбі күндері штат қызметкерлерімен бірлесіп, сенбіліктер ұйымдастырдық. Бұл істе орынбасарларым Роллан Дүйсенбай, Ақылбек Есімов, 43 жылдық еңбек өтілі бар сауықтыру орталығының бас дәрігері Роза Қалиева, аға әкімшілік қызметкері Ризагүл Гусакова көп көмек көрсетті. Олар оңалту орталығына емделуге және таза ауамен тыныстап, денсаулығын түзеуге келгендермен тіл табысып, ақыл-кеңестерін береді. Қазір біздің мекемеде 200 адам қызмет етеді», дейді бізбен әңгімесінде Арыстан Жанғазиев.
Мұнда демалушыларға барлық жағдай жасалған. Төрт мезгіл тағам беріледі. Ем алушылардың бос уақытын мәнді өткізуіне көңіл бөлінеді. Бильярд, үстел теннисі, жаттығу жасайтын арнайы бөлмелер қашан келсең де ашық. Аптасына бірнеше рет спорт жарыстары өтіп тұрады. Реті келгенде айта кету керек, шипажай директорының бірінші орынбасары Роллан Мейрамұлы еркін күрестен КСРО спорт шебері, кезінде сан мәрте дүбірлі додаларда топ жарған. Шипажайдың бас директоры Арыстан Архимедұлы да спортқа бейім, демалушылар арасында жарыстардың мәнді өтуіне көңіл бөледі. Шахмат турнирінде 82 жастағы Есімхан Жукич, Бақытбек Қоңдыбаев сияқты белсенді ақсақалдар жүлделі орындарды бөлісті. Ем алушыларға белгілі әнші Бауыржан Исаев, Шущинск қаласынан келген әртістер Гүлім Құдысбек, Нұрай Қабиден, Самғау би тобының өнерпаздары, «Думан» вокальды аспаптар тобының әншілері көңілді кеш сыйлады. Шипажайдағы музыкалық жетекші Біржан Хамзиннің айтуынша, демалушылар 14 күннің ішінде би билеп, түрлі байқауларға қатысады, күн аралатып қызықты концерттерді тамашалайды.
Сауықтыру орталығында қызмет ететіндердің барлығы – өз мамандығын жетік меңгерген, жұмыс өтілі 15-20 жыл, тіпті одан да көп, нағыз өз ісінің майталмандары. Бас дәрігер Роза Қалиева – денсаулық саласында 43 жылдан бері үзіліссіз қызмет етіп келе жатқан жоғары санатты дәрігер. Кейінгі 7,5 жылдан бері өзінің білімі мен біліктілігін, мол тәжірибесін мүгедектер мен зейнеткерлерге арнаған. Дәрігерлер мен ұйқалаушылар Забира Хасенова, Рустам Валиуллин, Зина Баталова, Зүлфия Қанғожина, Анар Торғаева, балшықпен емдеуші Гүлжан Еңкебаева, Анна Стасенко қарапайым еңбектерімен демалушылар алғысына бөленуде.
Сауықтыру орталығының бас дәрігері Роза Қалиеваның айтуынша, мұнда медициналық қызметтің 47 түрі бар. Тұзды су, магниотерапия, балшықпен емдеу, ұйқалау, электр, биотрон, парафин дейсіз бе, ем алушылар қалауынша пайдалана алады. Корпустардың іргесіндегі Қотыркөл көлінің суы шипалы, түрлі дерттерге мың да бір ем. Ыстық жаз айларында демалушылар көлге шомылады, күнге қыздырынады.
«Әттең, сумен емдеуге қажетті ванналар жетіспейді. Қыс мезгілінде арасы қашық екінші және үшінші корпус арасында далаға шықпайтын дәліз салынса, оң болар еді. Тіпті жаңа ем алатын корпус салатын уақыт жетті. Спорт залы құрылысын да салу керек. Мұның бәрі – шешімін табатын проблемалар. Интернет, вай-фай сымдары жаңартылды», дейді бас дәрігер.
Қалай дегенде де, сауықтыру орталығының қызметіне ем алушылар дән разы.
Оңдасын ЕЛУБАЙ,
«Егемен Қазақстан» газетінің ардагер тілшісі
