Облыс орталығындағы фестиваль жалғасы конференцияға ұласты. Алыс-жақыннан келген жыраулар Бұқар бабаның шығармашылығы хақында ой алмасты. Қазақ ұлттық өнер университетінің профессоры, жырау Алмас Алматов Бұқар баба мұрасының бүгінгі қоғамдағы өзектілігі жайында: «Бұқар жырау – бүтін қазақтың, Алаш бірлігінің күретамыры. Шығармашылығында елдік мәселе қозғалады. Ұлт болып ұйысудың маңызын өзінің жырларымен жеткізген. Ол хан алдында да, қара алдында да тайсалмай сөйлеген. Бұқар жырау біздің 1000 жылдық мәдениетімізді бойына сіңіріп, соны жырларына арқау еткен. Баба жырлары өзектілігін әлі жоғалтпады. XXI ғасырға жеткен мұралары ұлтқа бағыт-бағдар нұсқарына күмән жоқ», деді А.Алматов.
Маңғыстау облысынан арнайы келген Амандық Көмеков те Көмекей әулиенің халықтың мұңын ашық айтқанын, сол кездегі саяси мәселелерге бел шешіп араласқанын атап өтіп, мұндай қайраткерлердің ғасырлар бойы дәріптеле беруі керектігін жеткізді.
Қала тұрғындары Қарағандының орталық саябақ сахнасында еліміздің әр қиырынан келген жыраулар өнерін тамашалады. Бұл мерекелік іс-шараның ерекшелігі – Бұқар толғаулы әр өңірдің мақамында жырланды. Жыршы-жыраулардың көшін бастап келген Алмас Алматов өзінің төл толғауын орындап берді. Қызылордадан келген Ұлжан Байбосынова Бұқар жыраудың толғауын Сырдың мақамына салып айтты. Айтыскер ақын, жыршы Дидар Қамиев Арқаның мақамымен толғады.
Бұқар жырау фестивалі осыдан он шақты жыл бұрын айтыскер ақын Айтбай Жұмағұловтың бастамасымен қолға алынған еді. Содан бері жыл сайын дәстүрлі түрде өтіп келеді.
«Бұқарекең жырлайды» фестивалі 2008 жылдан бері өткізіліп келеді. Бұқар жыраудың 350 жылдығы бес жыл бұрын халықаралық деңгейде дүркіреген еді. Биыл 355 жылдығы республикалық ауқымда ұйымдастырылды», деді фестиваль ұйымдастырушысы Айтбай Жұмағұлов.
Фестиваль қорытындысы бойынша қатысушыларға арнайы сыйлықтар мен Алғысхаттар табысталды.
Қарағанды облысы
