Коллажды жасаған Қонысбай ШЕЖІМБАЙ, «EQ»
Жалпы ауданы 264 га құрайтын учаске 2018 жылдан бастап көзделген мақсатта пайдаланылмаған, жалдау ақысы төленбеген. Сонымен қатар орман өрттері қаупінің жоғары дәрежесіне қарамастан, олардың алдын алу бойынша іс-шаралар жүргізілмей, өртке қарсы жоспарлар әзірленбеген. Бұл мән-жайларды негізге ала отырып, аудан прокуратурасының актісі бойынша уәкілетті орган сотқа жүгінді. Ақмола облысының мамандандырылған ауданаралық экономикалық сотының шешімімен ұзақмерзімді орман пайдалану шарты бұзылып, жалпы құны 1,6 млрд теңгені құрайтын учаске мемлекет меншігіне қайтарылды.
Бұдан бөлек, жақын күндері Астана қаласының прокуратурасы мемлекетке 700 млн теңгеге жуық жер телімдерін қайтарғанын айта кетейік. Қала прокуратурасы мемлекет мұқтаждығы үшін алынған жер телімдері бойынша сот актілерінің орындалуына тексеріс жүргізген болатын. Тексеру барысында акционерлік қоғам еріксіз иеліктен шығарылатын жер учаскесі үшін 663 млн теңге көлемінде өтемақы алғаны анықталды. Алайда 2 жыл бойы соттың мектеп пен жатақхана салу үшін 2 жер телімін мемлекетке беру туралы шешімін орындамаған. Прокурорлық қадағалау актісі бойынша сот шешімі орындалып, жер учаскелері мемлекетке берілді.
