Өңірлік деңгейде ұйымдастырылған жайдарманшылар додасына жеті команда қатысып, жүлделі орындарды сарапқа салды. Командалардың өнеріне әзіл әлемінде өз орнын қалыптастырған мамандар төрелік етіп, лайықты бағасын берді.
Ашық аспан астында өткен іс-шарада өткір әзілдерімен дараланған «Престиж» командасы жеңімпаз атанса, «Әдіби жігіттер» командасына жүлделі екінші орын бұйырды. «Давмир» командасы үздік үштікті қорытындыласа, арулардан құралған «Ою» командасы «Көрермен көзайымы» аталымына лайық деп танылды.
«Анығында «Жайдарман» тек әзіл айту ғана емес, жастарды мәдениетке баулитын тамаша ойын екені рас. Алайда соңғы 3 жылда жастар қозғалысының жұмыс қарқыны бәсеңдеп қалған болатын. Биылдан бастап облыс бойынша «Жайдарман» ойынына жергілікті бюджеттен бөлінген қаржы 5 есе артып отыр.
Жүргізілген жұмыстардың нәтижесінде «Жуалы», «Медиум» командалары республикалық жоғары лигаға, «Престиж» жайдарман тобы республикалық ашық лигаға жолдама алса, 6 командамыз республикалық «Номад» лигасында бақ сынамақ. Қысқасы, аталған ойынға қызыққан жастарға жан-жақты қолдау көрсетіліп жатыр», дейді облыс әкімдігі жастар саясаты мәселелері басқармасының басшысы Жомарт Зұлпыхар.
ТАРАЗ
