Суретті түсірген Ерлан ОМАР, «ЕQ»
Ауыл шаруашылығы өндірісін дамыту және қырдағы жұртшылықты жаппай жұмыспен қамту мақсатында 2023 жылға «Ауыл Аманаты» бағдарламасы бойынша 2,059 млрд теңге бөлінген еді. Бұл қаражатқа 535 жұмыс орнын ашып, 425 шағын несие беру жоспарланып отыр.
«Ауыл аманаты» бағдарламасына қатысатын Абай облысының 6 ауданы анықталды. Атап айтқанда, Абай, Ақсуат, Аягөз, Жарма, Көкпекті, Үржар аудандарында аталған бағдарлама талаптарына сай жұмыстар атқарылады.
Екі бағыт бойынша шағын несиелер беру жүзеге асады. Яғни мал шаруашылығы саласында 1 548 331 000 теңгеге 316 шағын несие беру көзделсе, өсімдік шаруашылығы саласында 511 млн 250 мың теңгеге 109 шағын несие беру жоспарланып отыр. Несиелеу жұмыстарын орындау өткен шілде айынан орындала бастаған. Сенім білдірілген агент ретінде анықталған «Семей» ӘКК» АҚ маусым айында ауылдық округ әкімдеріне несие беру шарттары бойынша семинар өткізген еді. Жоғарыда айтылған 6 ауданда шарттарды түсіндіру және құжаттарды қабылдаумен ауылдық әкімдік қызметкерлері айналысады.
Қазіргі уақытта «Семей» ӘКК» АҚ агенттің шотына 1 млрд 245 млн теңге көлемінде бюджет қаражаты аударылған екен. Қалған 814,8 млн теңгені алдағы қыркүйек айында игеру көзделіп отыр. Құжаттарды қабылдау барлық 6 ауданда басталды.
Қазіргі күнде 466,2 млн теңгені қамтитын 77 өтінім қаралып, сол орайда қажетті несиелер беру туралы оң шешім қабылданған.
Абай облысы
