Өнер • 06 Қыркүйек, 2023

Ертегілердегі ханбок

261 рет
көрсетілді
6 мин
оқу үшін

Астанадағы Ұлттық музейде корей суретшісі – иллюс­траторы У Наённың «У Наён­мен Қазақстанда кездесу: ертегілердегі ханбок» атты тамаша көрмесі ашылды. Көрме болғанда қандай, аузыңды ашып, көзіңді жұмасың. Бұл мазмұнды іс-шара іргелі екі ел арасындағы мәдени ал­масу жылы аясында ұйым­дастырылды. Оған Қазақ­стандағы Корея Респуб­ликасы елшілігінің Корей мә­­дени орталығы мұ­рын­дық болды.

Ертегілердегі ханбок

Көрме екі тақырыптан тұра­ды. Біріншісі, әйгілі ертегі кейіп­керлерін бейнелеу арқылы корей дәстүрлі киімін таныстыратын «Ертегілердегі ханбок» сериясы болса, екіншісіне «Ханбок киген қыз» деген атау берген. Көрмеге талантты сурет­шінің 24 жұмысы қойылды. Оның туын­дылары ұлттық на­қыш­қа бай, әсіресе «ханбок» киіміне негіз­делген дәстүрлі эле­ме­нттер­ді қам­тиды.

Бірнеше елде көрмесі өткен У Наён туындылары дүние жүзіне өте танымал. Сонымен бірге ол Netflix, Disney, Marvel, Samsung, LG және тағы басқа атағы жер жарған әлем­дік брендтермен бірлесіп жұ­мыс істеген. 2019 жылы Корея Рес­публикасы Мәдениет, спорт және туризм министрлігінің «Хан­бокті насихаттауға қосқан үлесі үшін» сыйлығын иеленген.

чсм

Мәдени іс-шараның ашылуында Ұлттық музей директорының міндетін атқарушы Айбек Сыды­қов екі ел арасындағы мәдени-рухани байланыс пен көрменің маңызын атап өтті.

«Қазақстан мен Корея ара­сындағы, оның ішінде мәде­ниет саласындағы қарым-қатынас қарқынды дамып келеді. Бүгінгі іс-шара да осы мәдени ынты­мақ­тастық бағытында өтіп отыр. Көрменің де мазмұны өте бай. Өйткені оны көргендер корей елінің дәстүрімен, мәдениетімен, тарихымен танысып, рухани байи түседі», дей келіп, сонау Кореядан ат арытып келген қылқалам ше­беріне ризашылығын жеткізді.

Одан кейін Қазақстандағы Корея Республикасының Төтенше және өкілетті елшісі Чжо Тэик жиналған қауыммен қазақша аман­дасып, қазақ тілінде сөйледі. Бұған ішіміз жылып қалды.

«Құрметті достар!» – деп бас­тады сөзін елші. – Былтырдан басталған Корея мен Қазақ­стан­­­ның өзара мәдени алмасу жылы аясында бірнеше іс-ша­ра ұйымдастырылды. Ал 2023 және 2024 жылдар Кореяға бару жылы болып жарияланды. Сондықтан уақыттарыңыз бен мүм­кіндіктеріңіз болса, осы жыл шең­берінде Корея еліне сая­хаттап, оның тарихымен, дәс­түрімен жақын танысуға болады. Биылғы көктемде Тұңғыш Пре­зидент кітапханасында корей фотосуретшілерінің көрмесі болды. Мына іс-шара да соның жал­ғасы деп айта аламыз. Мұнда суретшінің корей халқының сан ғасырдан бері сақталған мәдениеті мен дәстүрлі ұлттық киімін заманауи үлгімен әсем үйлестіріп, әдемі бейнелеген жұмыстары ұсынылды. Сондықтан осы іс-шараны өткізуге белсене ат­са­лысқан барша азаматқа алғы­сымды айтамын», деді ол.

чсм

Шынында, У Наён өз шығар­машылығында дәстүрлі қоғам мен қазіргі заман бейнелерін қисынын тауып, шебер үндестіреді. Ол «Хван Чжин И» телехикаясын көргеннен кейін шабыт алып, корей дәстүрлі киімі «ханбоктің» сұлу­лығын бейнелейтін иллюс­трациялар сала бастаған. Сурет­ші негізгі жұмыстарында бас­ты кейіпкерлерді «ханбокте» бейнелеу арқылы Шығыс пен Ба­тыстың үздік дүниелерін жаңаша түсіндіреді. Оның үлгісі ретінде Батыс ертегілеріндегі хан­ша­йым­дардың көріністері мен Голли­вуд актерлерінің корей кескін­де­ме стиліндегі бейнелерін айта аламыз.

Мәселен, автордың көрмеге қойылған «Аққу ханзада», «Ақ­шақар – Ақшақар мен жануарлар», «Сұлу мен құбыжық», «Алиса ғажайыптар елінде», «Қызыл телпек» және тағы басқа да корейдің «ханчжи» қағазына жикле технологиясымен басып шығарған жұмыстары мінсіз сұлулығымен, табиғилығымен, қанық бояуы­мен көз тартады. Сондай-ақ су­ретші корейлердің түрлі нақыш­тағы ұлттық киімдерін бедерлеген иллюстрациялары арқылы өз халқының дәстүріне тән ерек­шелікті, сыпайы болмысты, әсем­дікті айшықты жеткізген.

У Наённың біздің елімізді танып-білуі де қызық. Оны өзі айтып берді. «Бірде теледидар­дан Қазақ жерінде тұратын этностық корейлер туралы түсірілген деректі фильмді көріп, осы елге өзімнің бір жақындығым бар екенін сезіндім. Мен үшін әсіресе қазақстандық корейлердің ұр­пақтан-ұрпаққа өз тілі мен дәстүрін сақтап келе жатқаны өте әсерлі болды. Сонымен қатар жергілікті корейлердің ұлттық тағамы айрықша таңғалдырды. Мысалы, «кимчи» корей дәстүрлі жеңіл тамағы қазақстандық қос­паларымен толығып, дәмді «корей салатына» айналған. Сон­дықтан мен міндетті түрде осы елге баруым керек деп ойладым. Міне, сәті түсіп орталарыңызда тұрмын. Бұған өте қуаныштымын. Бүгінгі көрмеге келген қонақтар «ханбоктің» ерекше сұлулығын сезіне алады деп сенемін», деді ол.

Бұл көрменің тағы бір ерек­шелігі ретінде суретшінің хал­қымыздың «Ер Төстік» қиял-ғажайып ертегісі негізінде бейнелеген еңбегін бөлек айтсақ болады. Бұл туынды екі ел арасындағы мәдени алмасу жылы аясында арнайы салынған. Шығармада сурет­ші қазақ ертегісі мен дәстүрлі корей мәдениетін сабақтастыра отырып, Ер Төстіктің жолында кездескен қиындықты қажымас күш-қайраттың арқасында жеңгенін бейнелейді.

«Бүгінге дейін біраз елде көрме өткіздім. Соған дайындық кезінде сол елдің бір ертегісінің желісімен сурет салғанды жақсы көремін. Осында көрме өткізетін болғандықтан, Қазақстандағы Корей мәдени орталығы маған біраз қазақ ертегілерін жіберді. Соның ішінен «Ер Төстік» ер­тегісін оқып, қатты ұнаттым. Бұл ертегінің бас кейіпкері Ер Төстік – бойында күш-қайраты тасыған жігіт. Ағаларын іздеп жолға шық­қанда оған жанашыр болған кейіпкерлердің өзі – қызықты бейнелер. Мәселен, Көлтауысарға ұқсас кейіпкер бізде де бар. Міне, осының бәрі маған әсер етіп, жақсы туынды дүниеге келді», деді қылқалам шебері.

Айта кетейік, У Наённың көр­месі 15 қазанға дейін жалғасады.