«US Open» мәресіне жетті

Жартылай финалда Даниил Медведев әлемнің бірінші ракеткасы, испаниялық Карлос Алькарастан айласын асырғанда барша сарапшы мен жанкүйер ақтық сында ол Новак Джоковичке лайықты қарсылық көрсетіп қана қоймай, бас жүлдені олжалауы да әбден мүмкін деп топшылаған еді. Бірақ олай болмады. Финалдық сайыс Сербия саңлағының айқын басымдығымен өтті. Бәсеке барысында ресейлік ойыншы бірде-бір рет брейк жасаған жоқ. Ал Новак болса, бірнеше рет Даниилдің берген добына иелік ете алды. Нәтижесінде, үш сеттік сайыс 6:3, 7:5, 6:3 есебімен аяқталды. Бұл кездесу 3 сағат 17 секундқа созылды.

Естеріңізге сала кетейік, Новак биылғы US Open турнирінде Даниил Медведевтен бөлек, Александр Мюллер (Франция), Бернабе Сапата-Миральес (Ис­пания), Ласло Дьере (Сербия), Борна Гойо (Хорватия), Тей­лор Фриц (АҚШ) және Бен Шел­тонды (АҚШ) шаң қаптыр­ды. Ресейдің өкілі Карлос Аль­карастан бөлек, Атилла Балаж (Мажарстан), Кристофер О’Кон­нелл (Аустралия), Себастьян Баэс (Ар­гентина), Алекс де Ми­нор (Аус­тра­лия) және Андрей Рублевтен (Ресей) басым түсті.

Осылайша, Новак Джокович «Үлкен дулыға» санатындағы жарыстарда жеңіп алған жүлделер санын 24-ке жеткізді. Бұл – ер­лер арасындағы рекордтық көр­сеткіш. Тарқатып айтсақ, ол US Open додасында төрт мәрте дараланса, Ролан Гарросты үш рет ұтты. Уимблдонның жеті дүркін жеңімпазы атанса, Аустралияның ашық біріншілігінде 10 рет ал­дына жан сал­мады. Новак атал­ған жарыстардың финалында барлығы 47 рет өнер көр­сетті. Бұл да рекордтық нә­ти­же. Салыстырмалы түрде ал­­сақ, испаниялық Рафаэль На­­­дальға бұл белес 22 рет ба­ғын­са, швейцариялық Роджер Фе­дерердің 20 мәрте ме­рейі үс­тем болды. Ал әй­ел­­дер ара­сын­да Мар­га­­рет Корт­тың шо­қ­тығы биік. Өткен ға­сырдың алпысыншы және жетпісінші жылдары атой салған Аустралияның өкілі де «Үлкен дулыға» додаларында 24 рет топ жарды. Десек те Джоковичтің бұл рекордты жаңартуына әлі де мүмкіндігі бар. Өйткені Корт үлкен спорттан әлдеқашан қол үзіп кеткен, ал 36 жастағы сербиялық теннисші бұл күндері бабында. Осы та­бысының ар­қа­сында Новак әлемдік рей­тингте қайта көш бастады.

Әйелдердің жұптық сайысы Габриэла Дабровски (Канада) мен Эрин Рутлифтің (Жаңа Зеландия) жеңісімен аяқталды. Финалда олар Лаура Зигемунд (Германия) пен Вера Звонареваны (Ресей) ұтты – 7:6, 6:3. Ерлердің жұптық бәсекесінде Раджив Рам (АҚШ) мен Джо Солсберидің (Ұлыбритания) бағы жанды. Шешуші тұста олар Рохан Бо­панна (Үндістан) мен Мэттью Эбденді (Аустралия) сүріндірді – 2:6, 6:3, 6:4.

Қазақстан теннисшілер жа­йын­да айтар болсақ, АҚШ-тың ашық біріншілігінің жекелеген сайысындағы ең үздік көрсеткіш Елена Рыбакинаға тиесілі. Ол Марта Костюк (Украина) пен Айла Томляновичті (Аустралия) ұтып, үшінші кезеңде Сорана Крыстяға (Румыния) есе жіберді. Юлия Путинцева тұсаукесер кездесуінде тізе бүкті. Италиялық Мартина Тревизанды алғашқы сетте 6:0 есебімен ұтқанымен, одан кейін екі рет тай-брейкте ұтылды. Ерлер арасында сынға түскен Александр Бублик пен Тимофей Ска­товтың екеуі де алғашқы айналымнан аса алмады. Бублик Доминик Тимге (Аус­трия), Скатов Алекс де Минорға (Аус­тралия) жол бе­рді. Бұған дейін ха­бар­лағанымыз­дай, есесіне Қа­зақ елі­нің жанкүйерлері Анна Данилинаның же­ңісіне ерекше шаттанды. Аралас жұптар сайысында жерлесіміз фин­ляндиялық Харри Хелиёваарамен бірге қарсылас шақ кел­тір­мей, бас жүлдені олжалады.