Мәскеу сапары жерлестеріміз үшін сәтті басталған еді. 12-минутта швециялық легионер Понтус Оберг есеп ашып, бізді бір қуантып тастады. 16-минутта Эрик О’Делл таразы басын теңестірді. Үзілістен кейін қарқынын күрт күшейткен «Барыстың» ойыншылары тағы екі шайбаны қақпаға тоғытты. Бұл жолы Аркадий Шестаков пен Нельсон Ножье мергендік танытты. Сол сәтте елордалық клуб енді айдын иелеріне ойын тізгінін бере қоймас деп ойладық. Бірақ бәсекенің аяқталуына небәрі алты минуттай уақыт қалғанда Джордан Уил қатарынан екі мәрте нысананы дәл көздеп, таразы басын теңестірді. Овертаймда «Динамоның» бағы жанды. Жеңіс голын Даниил Пыленков соқты. Есеп – 4:3.
Биылғы маусымда жеңілістен көз ашпаған «Барыс» қазіргі кезде 21-орынды қанағат тұтуда. Бізден кейін тек Тольяттидің «Ладасы» мен Балашиханың «Витьязі». Өзінің келесі кездесуін жерлестеріміз 16 қыркүйекте Астанада Владивостоктың «Адмиралымен» өткізеді.
