Саясат • 18 Қыркүйек, 2023

Қоғам және отбасы: қауіпсіздік кілті

47 рет көрсетілді

Таяуда Будапештте отбасы қауіпсіздігіне арналған демогра­фиялық саммит өтті. Екі жылда бір рет ұйымдастырылатын жаһандық іс-шарада отбасылық-демографиялық саясаттың Қазақстан моделі ұсынылды.

Қоғам және отбасы: қауіпсіздік кілті

Халықаралық саммит – саясат­керлер, сарапшылар, дін, бизнес, ғылым және БАҚ өкілдері демография және отбасы инс­титутына әсер ететін негізгі мәсе­лелерді талқылайтын алаң. Биыл іс-шараға әлемнің 60 мем­лекетінен мәртебелі меймандар шақырылған. Еліміздің аты­нан Мажарс­тан тарапының шақыруымен сам­мит жұмысына Мәдениет және ақпар­ат министрі, Әйелдер істері және отбасы­лық-демографиялық саясат жөніндегі ұлттық комиссияның төрағасы Аида Балаева арнайы қатысты. Министр Мажар­стан, Қатар, Тү­р­кия, Сербия, Слове­ния, Марок­ко, Эквадор және басқа да бір­­қатар елдің өкілдерімен бірге ми­нистр­лердің интерактив­ті панельдік сессиясында сөз сөйледі.

«Жас ұрпақ отбасылық институты құндылықтарын, сүйіс­пен­шілік пен қамқорлықты сіңі­реді, соның арқасында жас­тар бола­шақта шаңырақ көтеру үшін өздерін қауіпсіз әрі мықты сезіне алады», деп Аида Балаева мемлекеттің тұрақты дамуы үшін отбасы институтының маңызды рөлін атап өтті.

«Қазақстан – көпэтносты мемлекет. Елде 100-ден аса этнос пен 18 діни кон­­фессия өкілдері тұра­ды», деген министр еліміздің бір­қатар дем­ографиялық ерек­­шелігіне де тоқ­талды. Бұған қоса отандас­тары­мыздың орташа жасын да атап өтті.

«Қазақстан – жастардың елі, отан­дастарымыздың орташа жасы – 32 жас. Жастар ха­лық­­­тың 30 пайызын құрайды. Демо­графтар еліміздегі бірқатар тәуекелді атап көрсетіп жүр. Десе де біз мем­лекеттегі жастық­тың күш-жігерін елдің даму мүмкіндіктері­не айналдыру үшін қолдан келген­нің бәрін жасаймыз. Бұған ел Президенті Қасым-Жомарт Тоқаев та ерекше мән беріп отыр», деді А.Балаева.

Сондай-ақ Аида Балаева еліміздің отбасылық-демо­гра­фиялық саясатын қалып­тас­ты­рудың институционалдық негіз­дерін, оның ішінде реформалар мен әлеуметтік қолдау жүйесін дамыту туралы жан-жақты айтып берді. Әрі қарай балаларды тәрбиелеу үдерісіне елеулі әсер ететін өзекті мәселелерге тоқталып, оларды шешу бойынша қабылданып жатқан шараларды атап өтті. Сөз арасында Аида Балаева келесі саммитте жаңа медианың құндылық бағдарларын қалыптастыруға әсері және заманауи сын-қатерлердің алдын алудағы отбасының рөлін арттыру тақырыптарын талқылауды ұсынды.

Сапар аясында Мәдениет және ақпарат министрі Мажар­станның мәдениет және иннова­циялар министрі Янош Чак­пен және Әзербайжан Ұлттық Жи­на­лысының төр­ағасы Сахи­ба Гафаровамен кездесті. Олар екі­жақты мәдени ынтымақ­тас­тықты арттыру жайын талқылады. Әрі екі елдің отбасылық-демографиялық және мәдени-гуманитарлық қаты­настар саласындағы өзара іс-қимылын арттыруға қызығу­шылығын білдірді.