Теннис • 19 Қыркүйек, 2023

Болгариядан басым түстік

171 рет
көрсетілді
2 мин
оқу үшін

Болгарияның бас шаһары – Софияда өткен Дэвис кубогінің плей-офф са­йысын­да Қазақстанның теннисшілері Болгария құрамасын 3:1 есебімен ұтып, 2024 жылдың ақпан айында өтетін іріктеу турнирінің финалында күш сынасу құрметіне ие болды.

Болгариядан басым түстік

Биылғы Дэвис кубогіне Болгарияның басты жұлдызы, әр жылдары Уимблдон және АҚШ пен Аустралияның ашық біріншіліктерінде жартылай финалға дейін жетіп, АТР турнирлерінде сегіз рет дара шыққан Григор Димитров қатысқан жоқ. Бұл жағдай біз үшін қолайлы болды. Аталған мемлекеттің өзге ойыншылары аса мықты емес еді. Тұсаукесер бәсекеде Тимофей Скатов (әлемнің 121 ракеткасы) Димитар Кузмановпен (№178) біраз тіресті. Алғашқы сетте болгариялықтың мысы басым болса, қалған екеуінде жерлесіміздің асығы алышысынан түсті. 2 сағат 46 минутқа созылған тартыс 3:6, 6:4, 6:3 есебімен Скатовтың пайдасына шешілді.

Көп кешікпей Александр Бублик (№29) пен Янаки Милев (№567) кортқа шықты. Еліміздің бірінші ракеткасы әлемдік рейтингте өзінен әлдеқайда төмен тұрған қарсыласын еш қиналмай ұтты. Есеп – 6:4, 6:1. Бұл бәсеке 1 сағат 7 минутта тәмамдалды.

Келесі күні жұптық бәсекеде Александр Бублик пен Александр Недовесов Александр Донской мен Александр Лазаровпен күш сынасты. Бұл ойында болгариялықтардың бағы жанды – 6:3, 6:3. Төтінші кездесуде Бублик Кузмановты 6:4, 7:6 есебімен қапы қалдырып, Қазақстан құрамасына жеңіс сыйлады. Қорытынды есеп – 3:1.

Сондай-ақ отандық теннисшілерімізге қатысты тағы екі жағымды жаңалығымыз бар. Аружан Сағындықова Тунистің Монастир қаласында өткен турнирде бас жүлдені ол­жалады. Алғашқы айналымдарда 18 жастағы Аружан үн­діс­тан­дық Смрити Бхасинді, да­ния­лық Элина Ямшидиді словакиялық Лаура Циле­кованы ұтса, жартылай финалда литвалық Андре Луко­шютені сүріндірді. Шешуші тұста Ауржан Үндістанның тағы бір өкілі Вайшнави Ад­кардан айласын асырды.

Ал ресейлік Анна Калини­намен жұп құрған Қазақстанның екінші ракеткасы Юлия Путинцева Жапонияның Осака қаласында шымылдығы түрілген халықаралық турнирдің финалына дейін жетті. Бірақ оларға бас жүлдені олжалау бақыты бұйырмады. Шешуші тұста аталған теннисшілер Анна-Лена Фридзам (Германия) мен Надежда Киченокке (Украина) 6:7, 3:6 есебімен есе жіберді. Сон­дай-ақ Путинцева жекелеген сайыста да өнер көрсетіп, ширек финалда қытайлық Ван Синьюй­ге жол берді – 6:7, 7:6, 3:6.