Кәсіпқой бокс • 19 Қыркүйек, 2023

Жекпе-жекке шақырды

152 рет
көрсетілді
3 мин
оқу үшін

Ұлыбританияның танымал кәсіпқой боксшысы Крис Юбенк еліміздің мақтанышы Геннадий Головкинді жекпе-жекке шақырды. Әлеуметтік желі арқылы ол GGG-ге «Мен Генамен бұрыннан бері жұдырықтасқым келіп жүрген. Бірақ реті бір келмеді. Енді біздің бетпе-бет келуімізге еш кедергі жоқ деп ойлаймын. Егер Головкин қаржылық жағдайын жақсартқысы келсе, менімен күш сынассын. Сонда ол материалдық тұрғыдан үлде мен бүлдеге оранады» деген жазба қалдырды.

Жекпе-жекке шақырды

Крис Юбенк күні кеше 34 жасқа толды. Оның шыққан тегі – ямайкалық. Ұлыбританияның Шығыс Суссекс өңірінде дүниеге келген Кристің өзімен аттас әкесі де кезінде осы спорт түрін серік етіп, 1990-1995 жылдар ара­лығында орта салмақ пен екін­ші орта салмақта әлем чемпионы атанды. Үлкен спорттан қол үзгеннен кейін ол ұлын боксқа машықтандырып, оның биік белестерден көрінуіне сүбелі үлес қосты.

ми

Крис Юбенк өзінің тұсаукесер кездесуін 2011 жылдың қоңыр күзінде өткізді. Сол кезден бері 36 мәрте шаршы алаңға шығып, 33 рет жеңіске жетті. 24 бәсекеде айқын басымдық танытты. Ке­зінде WBA (2015-16) нұсқасы бо­йын­ша уақытша әлем чемпио­ны атанып, IBO-ның (2017-2018, 2019-2020) чемпиондық белбеуін иеленді. Жекпе-жектерінің денін Ұлыбританияда өткізген Крис Дания, Германия, Сауд Арабиясы және АҚШ-қа бір-бір реттен сапар шекті. Әр жылдары ол Дмитрий Чудинов, Гэри О’Салливан, Том Дюран, Артур Абрахам, Джеймс Дигейл, Матвей Коробов, Ваник Авдиян сынды саңлақтарды сабады.

Юбенк өзінің 19-кездесуінде алғаш рет жеңілістің кермек дәмін татты. 2014 жылдың 29 қарашасында Лондонда ол Билли Джо Сондерске есе жіберді. 2018 жылдың 17 ақпанында Манчестер қаласында Джордж Гроувздан ұтылды. Екі ретінде де шешімді төрешілер шығарды. Былтыр 31 қаңтарда «Манчестер Аренада» Лиам Смиттен төртінші раундта техникалық нокаутпен жеңілді. Бұл боксшылардың барлығы да  Ұлыбританиядан. Арада жеті айдан аса уақыт өткен соң қос саңлақ дәл сол аренада қай­та қол­ғап түйістірді. Бұл жолы Юбенк Смитті 10-раундта сұла­тып салды.

Ал Геннадий Головкиннің жүріп өткен жолы жанкүйерлердің көз алдында. Кәсіпқой боксты серік еткен 17 жыл уақыт аралығында ол көптеген биік белестерді ба­ғындырып, чемпиондық тәждің талайын иеленді. 45 жекпе-жектің 42-сінде жеңіс тойын тойлады. 37 қарсыласын нокаутпен ұтты. GGG тек Мексиканың мар­қасқасы Сауль Альварестен екі рет ұтылып, бір мәрте тең түсті. Генаның соңғы рет рингке шыққанына тура бір жыл болды. Соған қарағанда даңқ­ты отандасымыз былғары қол­ғабын шегеге ілуге қамданып жүрген секілді.

Көбіне-көп Германия мен АҚШ-та жұдырықтасқан GGG Қазақстанда бір рет қана өнер көр­сетті. Сонау 2010 жылдың 16 жел­тоқсанында ол Астанадағы «Дәу­лет» спорт кешенінде колум­биялық Нильсон Хулио Тапияны үшінші раундта ұрып жығып, жергілікті жанкүйерлерді бір қуант­қан еді. Енді өзінің соңғы жекпе-жегін Геннадий Головкин қайтадан өз елімізде өткізсе деген тілегіміз бар.