Тағайындау • 20 Қыркүйек, 2023

Ақтау қаласының әкімі тағайындалды

465 рет
көрсетілді
1 мин
оқу үшін

Бүгін, 20 қыркүйекте Маңғыстау облысының әкімі Нұрлан Ноғаев Ақтау қалалық мәслихатының депутаттарына өз еркімен қызметінен кеткен Ербол Ізбергеновтің орнына қала әкімі қызметіне жаңа кандидатты ұсынды, деп хабарлайды Egemen.kz.

Ақтау қаласының әкімі тағайындалды

Қала әкімдігінің баспасөз қызметі нақтылағандай, ҚР Президенті Әкімшілігімен келісілген жаңа кандидат бұған дейін Маңғыстау облысы әкімінің орынбасары қызметін атқарған Ұлықбек Тналиев болды.

Ұлықбек Тналиев Атырау мұнай және газ институтының бакалавриатын «Технологиялық машиналар мен жабдықтар» мамандығы бойынша бітірген, «Техника ғылымдары» магистрі, сондай-ақ «Экономика және бизнес» магистрі академиялық дәрежесіне ие.

Еңбек жолын 2006 жылы азаматтық қоғам және жастар саясаты саласында бастаған.

Атырау облысы Махамбет ауданы әкімінің орынбасары, Атырау облысы жұмыспен қамтуды үйлестіру және әлеуметтік бағдарламалар басқармасы басшысының орынбасары, Атырау қаласы әкімінің орынбасары қызметтерін атқарды.

2020 жылдан 2022 жылға дейін қоғамдық-саяси жұмыс басқармасының басшысы, Ақпарат және қоғамдық даму министрлігі департаментінің директоры қызметтерін атқарды.

2022 жылдың маусымынан бүгінгі күнге дейін Маңғыстау облысы әкімінің орынбасары болды.

Қалалық мәслихат депутаттары Тналиевтің кандидатурасын қолдады.

Нұрлан Ноғаев Ербол Ізбергеновке атқарған жұмыстары үшін алғысын білдіріп, Ұлықбек Тналиевке Ақтау қаласының әлеуметтік-экономикалық дамуына қатысты бірқатар нақты тапсырмалар берді.