Бүгінде елімізде Президенттің тапсырмасы аясында экономиканы әртараптандыруға әрі өңдеуші өнеркәсіпті қолдауға бағытталған инвестициялық саясат жүріп жатыр. Кездесу барысында жобаның ағымдағы жағдайына назар аударылды.
Чжао Тинъюн қазір жер учаскесі айқындалып, компания парк құрылысын жүзеге асыруға жобалау институтын тартқанын атап өтті.
Премьер-министр мемлекеттік органдарға жалпы инвестиция көлемі 15 млрд доллар болатын ірі инвестициялық жобаны іске қосуға жәрдем көрсетуді тапсырды. Жоба өңір мен тұтастай алғанда елдің дамуына мультипликативтік әсер етеді.
Толық циклді өнеркәсіп паркін құру туралы тұжырымдамада бокситтерді терең өңдеу жолымен алюминийге айналдыратын жоғары интеграцияланған өндіріс құру қарастырылған. Алюминий тотығын өндіретін кәсіпорындардың қуатын жылына 4,8 млн тонна, электролиттік алюминийді 2,4 млн тонна деңгейінде ұстап тұру жоспарланып отыр. Терең өңдеу көлемі жыл сайын 1,2 млн тоннаны құрайды. Жобаны жүзеге асыру 10 мың адамды жұмыспен қамтамасыз етуге мүмкіндік береді. Өндірістік нысандардың құрылысы биыл басталады. 1-кезекті іске қосу 2028 жылы, жобалық қуатқа шығу 2029 жылы жүзеге асырылмақ.
