Спорт • 22 Қыркүйек, 2023

Біз дайынбыз!

171 рет
көрсетілді
10 мин
оқу үшін

Кеше Қытайдың Ханчжоу қаласындағы Атлетикалық ауылда еліміздің Мемлекеттік туы салтанатты түрде көтерілді. Көк туды көтеру салтанатына ел құрамасының спортшылары мен спорт саласын басқарушы мамандар қатысты.
Іс-шара барысында бес мемлекеттің – Қазақстан, Бутан, Ирак, Оман, Бахрейн тулары көтеріліп, әнұрандары шырқалды. Ресми іс-шарада біздің құрама қыз-жігіттерінің қатары өзге елдің спортшыларынан анағұрлым көп болды. Ел делегациясын Ұлттық Олимпиада комитеті Спорт департаментінің директоры Елсияр Қанағатов, комитеттің бас хатшысы Андрей Крюков, Туризм және спорт министрлігі Спорт және дене шынықтыру істері комитеті төрағасының орынбасары Айгүл Бектенова, бокстан ұлттық құраманың бас бапкері Мырзағали Айтжанов, регбиден ұлттық құраманың бас жаттықтырушысы Анна Яковлева, бокстан әлем чемпиондары – Асланбек Шымбергенов, Сәкен Бибосынов, Махмұт Сабырхан бастап шықты.

Біз дайынбыз!

Коллажды жасаған Алмас МАНАП , «EQ»

Мырзағали Айтжанов,

бокстан ұлттық құраманың бас бапкері:

Үш жолдамадан үміттіміз

– Ұзақ жолдан соң жігіттер бір күн демалды. Бізге арнайы берілген спортзалда алғашқы жаттығуымызды жасадық. Шәкірттеріме қарсылас болады-ау деген боксшылардың барлығын білеміз. Кезінде Данияр Елеусінов, Әбілхан Аманқұл, Тұрсынбай Құлахмет секілді мықты боксшыларымызға қарсылас болған филиппиндік Эумир Марсиаль кәсіпқой бокстан әуесқой боксқа қайта оралыпты. Ол бүгінде 80 кило салмақта жұдырықтасады. Нұрбек Оралбайдың ­басты қарсыласының бірі.

Біздің құрама сары құрлық додасына өте жоғары деңгейде дайындалып келді. Алматы облысындағы «Ақбұлақ» Олимпиада­лық орталығында спортшылар тауға шығып, дене дайындығын шыңдады. Қорытынды жаттығу Түркістан облысында өтті.

Кейінгі кезде бокста көптеген өзгеріс болып жатыр. Бұрын боксшылар Олимпия ойындарында 10, 11, тіпті 12 салмақта сынға түссе, қазір 7 салмақ қана қалды. Атап айтсақ, Париж төрінде ерлер 51, 57, 63,5, 71, 80, 92, 92 килодан жоғары салмақ дәрежесінде жұдырықтасады. Азия ойындарында да осы жеті салмақта финалға шыққан қос боксшы Олимпиада жолдамасын қанжығасына байлайды.

Бұйыртса, сол жеті салмақтан берілетін 14 жолдаманың мейлінше көбіне иелік етеміз деп ойлаймын. Барлығын ринг көрсетеді. Десе де үш жолдамадан дәмеліміз. Барлық жігіттерден үміт күтеміз. Бұл жолы бағы жанбағандарға лицензия тарататын жарыстар аяқталмайды. Азия ойындары – жолдама үлестірілетін жарыстардың басы. Париж Олимпиадасының жолдамалары сарапқа салынатын алда әлі екі ірі халықаралық турнир бар. Оның бірі – Италияда, екіншісі Бангкокта өтеді. Біріншісінде – 49, ал екіншісінде 51 лицензия ойнатылады. Демек Ханчжоуда жолы болмаған боксшыларға алда әлі де көптеген мүмкіндіктер бар. Біздің басты мақсатымыз – боксшыларды Париж Олим­пиадасына жеті салмақта толық құраммен апару.

вап

 

Барлық жағдай жасалған

Ұлттық Олимпиада коми­те­тінің өкілі Елсияр Қанағатов ту көтеру салтанатына жинал­ған спортшыларға сәттілік тілеп, Азия ойындары еліміз үшін маңызды спорт додасы екенін атап өтті.

– Бүгін Азия ойындарында еліміздің көк бай­­рағы көтерілді. Қа­зір 200-ге жуық спортшы Ат­летикалық ауылға келіп қо­ныстанды. Бұл жолы Қытай елі спорт­­шыларға жақсы жағ­дай жасаған екен. Жатын орыннан бастап, жаттығу залына де­йін тиянақты ойластырылған. Енді тек жарыс жолында аянбай тер төгіп, жанкүйерлерді қуан­ту ғана қалды. Спортшыларымыз ел үмітін ақтайды деп сенеміз. Атлеттерімізге сәт­тілік тілейміз, – деді Елсияр Қанағатов.

Туризм және спорт министр­лігінің өкілі Айгүл Бектенова Азия ойындарына арналған спортшылар қалашығында жан-жақты мүмкіндік айтты.

– Азия ойындарына келетін 800-ден астам адамның алғаш­қы легі 20 қыркүйектен бері осында жүр. Екінші делегация 23 қыркүйекте келеді. Осын­дай ретпен спортшыларымыз 1 қа­занға дейін Ханчжоуға келіп үлгере­ді. Елден келген арнайы қыз­меткерлеріміз спортшы­лар­ға қызмет көрсетіп жатыр. Спортшылар қоныстан­ған жер логистика тұрғысынан тиімді орналасқан. Жатын бөлмелері кең, еріктілер жоғары деңгейде қызмет атқарып жүр. Жаттығу залдары да көңілдегідей, көлік тасымалдарына да қатысты мә­селе жоқ. Енді спортшыларымыздан тек жеңіс күтеміз, – деді Айгүл Бектенова.

 

Боксшылар сақадай сай

Азия ойындарында  524 спортшы ел намысын қорғайтынын бұған дейін бірнеше рет жаздық. Барған спортшыларымыз елдің абыройын көтеріп, медаль алуға талпынатыны анық. Алайда бәрі бірдей жүлдегер болмаса да, солардың арасынан ел үмітін ақтайтын чемпиондардың шығатыны ақиқат. Енді солардың ішінде «Кімдерге сенім артуға болады?» деген сұраққа жауап іздеп көрейік.

Олимпиада не Азия ойындары болсын, бірінші кезекте боксшыларға үлкен сенім артылады. Бұл жолғы додаға қатысатын жеті боксшының екеуі – Олимпиада жүлдегері, үшеуі – әлем чемпионы. Сон­дықтан аталған спорт түріне жанкүйерлер үлкен үмітпен қа­райды. Дегенмен, біздіңше, бұл сында Махмұт Сабырхан мен Асланбек Шымбергеновтің же­ңімпаздар қатарынан көрінуіне мүмкіндік бар. Ал соңғы әлем чемпионатында атой салған Нұр­бек Оралбай финалға де­йін жетсе де – үлкен нәтиже бол­мақ. Ол финалда ежелгі қар­сыласы, қытайлық қазақ бокс­шысы Тоқтарбек Таңатқан­мен жұдырықтасуы ықтимал. Нұрбек Тоқтарбекпен Президент кубогінде және соңғы әлем біріншілігінде екі рет кездесіп, екеуінде де жеңіске жетті. Де­генмен бірінші кездесуден гөрі соңғы кездесуде Қытай атынан шығып жүрген Тоқтарбектің өте жоғары дайындықпен келгені әрі деңгейі әжептәуір өскені аңғарылды. Оның үстіне Азия ойындары Қытайда өтіп жатқанын да ескеру қажет.

Рио Олимпиадасының қола жүлдегері Сәкен Бибосынов­тың айтуынша, ол бүгінде жара­қа­тынан толық айыққан. Оның осы жолғы қарсыластары да мық­ты. Көбісі өзбек боксшы­сы Хосонбай Дусматовты Сәкен Би­­бо­сыновтың басты қарсы­ла­сы санайды. Отандасымыз­дың өзге қарсыластарын да есеп­­тен шығаруға болмайды. Себе­бі ­2021 жылғы әлем чемпиона­ты­­ның жеңімпазы жапондық Томоя Цубои, 2023 жылғы әлем біріншілігінің қола жүлдегері үндістандық Бориа Дипак, 2021 жылғы әлем чемпионатының жүлдегері, таиландтық Саенг­пхет Танарат сынды төрт құр­лықты мойындатқан боксшы­лар әжептәуір қарсылық таныта­ты­ны анық. Әйткенмен, Сәкен жарыс­қа 100 пайыз дайынмын деп отыр.

– Дайындық өте жақсы өт­ті. Ташкенттегі әлем чемпио­натына қарағанда, дайын­ды­ғым ойдағыдай. Ең бастысы, Азия ойындарында барлық қар­сы­ласымнан басым түсіп, ән­ұранымызды шырқатсам дей­мін. Сондай-ақ Олимпиадаға лицензия ұтып алғым келеді. 51 килода Азия құр­лығында кі­лең мықтылар жи­налған. Бү­гін­де әлем чемпион­дары мен жүл­де­герлерінің бар­лығы Азия ойын­дарына келіп отыр. Менің нәтижем алғашқы кездесуге байланысты. Ел үмітін ақтауға барымызды саламыз, – дейді әлем чемпионы Сәкен Бибосынов.

Ал қыздар боксында көш­басшылар көп болмаса да, әлем чемпионатының күміс жүлдегері Карина Ибрагимова, сондай-ақ екі дүркін әлем чемпионы Назым Қызайбай Азия ойындарында топ жарады деген сенімдеміз.

 

Төрттіктен көрінуге тырысамыз

Боксшылардан бөлек, жеңіс тұғырынан көрінеді-ау деген спортшылар құрамада жетіп артылады. Мысалы, еркін күрестен әлем чемпионатының екі дүркін қола жүлдегері, екі дүркін Азия чемпионы Азамат Дәулетбе­ков, грек-рим күресінен әлем чем­­пионатының екі дүркін қола жүлдегері, Азия чемпионы Айдос Сұлтанғали, қыздар күресінен әлем чемпионатының екі дүркін күміс жүлдегері, Азия­ның үш дүркін же­ңімпазы Жәмила Бақ­бер­генованың қай-қайсысы болсын құрама қоржынына алтын салуға лайық. Сондай-ақ каратэ­ден Токио Олимпиадасының қола жүлдегері София Берульцева мен әлем чемпионатының қола жүл­дегері Қайсар Алпысбайды ес­тен шығармауымыз керек. Ал регбиден Қазақстан әйелдер құ­­рамасы 2014 жылғы Азия ойын­­­­­дарының жеңімпазы екені бел­гілі. Ту ұстаушы, әлем чем­пио­­­­натының қола жүлдегері На­деж­да Дубовицкаядан да үміт көп.

Спорттық гимнастикадан Әлем кубогі кезеңінің жеңім­пазы Нариман Құрбанов, Уни­версиада чемпионы Милад Карими сынды атлеттеріміз Қа­зақ­стан әнұранын шырқатады деп сенеміз. Сонымен қатар сем­серлесуден Руслан Құрба­нов та атой салуы керек. Брази­лиялық джиу-джитсудан көп жа­рыста топ жарған Мансұр Хабибулла – басты фавориттердің бірі.

Ал шахматшылар арасын­да гросмейстерлер Бибісара Асау­баева, Жансая Әбдімәлік, Дина­ра Сәдуақасовалармен Азия тұр­мақ әлем шахматшылары сына-
сады.

Басқа да спортшыларды атап өтуге болады. Айталық, ки­бер­спорт, велоспорт, құзға өрме­леу, ескек есу, жүзу, нысана көз­­­­деу секілді спорт түрлерінен ән­­­­ұра­нымызды шырқауға лайық спорт­­шылар баршылық.

Жо­ғарыда айтқан 20-ға жуық спортшыны топ басына қой­ған­да, Қазақстан құрамасы бей­­­рес­ми командалық есепте бұған дейінгі жетістіктен асып түседі деп сенеміз. Ең бастысы спортшылары­мыз жергілікті климатқа тез бе­йімделіп, жауапты жарысқа тың күшпен шығуға тиіс. Жат­тықтырушылардың айтуынша, спортшыларымыздың дайын­дығы ойдағыдай. Ал олардың бағы мен бабы қатар шапса, жо­ғары нәтижеге қол жеткіземіз.