Марапат • 24 Қыркүйек, 2023

«Urker-2023» жеңімпаздары анықталды

169 рет
көрсетілді
7 мин
оқу үшін

Астанада бұқаралық ақ­па­рат құралдары өкіл­дері арасындағы дәстүрлі «Urker-2023» байқауының жеңімпаздары анықталды. Astana Media Week апта­лығы аясында өткен жиынға Мәдениет және ақпарат министрі Аида Балаева қатысып, іс-шараны ашып берді.

«Urker-2023» жеңімпаздары анықталды

Суреттерді түсірген – Игорь БУРГАНДИНОВ

«Мемлекет басшысы Түркі­с­танда өткен ұлттық құрыл­тай­да масс-медианың маңызын ерек­ше атап өтті. БАҚ саласы үнемі Президенттің назарында, ерекше бақылауында. Биыл ақпа­рат саласында бірқатар құжат қа­был­данған жыл болды. Ең басты­сы, мемлекеттік ақпараттық саясат­тың негізін айқындайтын құжат – Доктрина қабылданды. Қоғам үшін оның ішінде өскелең ұрпақты ақпарат қауіпсіздігі тұрғысынан қорғауға бағытталған заңды бекіт­тік», деді А.Балаева.

Сала басшысы БАҚ сала­сында қабылданып жатқан жаңа­шылдықтар ел игілігіне қызмет ететінін жеткізді. Сондай-ақ Astana Media Week іс-шарасы аясында медиа саласы мәселелері жан-жақты талқыланғанын атап өтті.

«Astana Media Week-ке отандық және шетелдік үздік сарапшылар қатысты. Айтулы іс-шараның қоры­тындысы ретінде «Urker» сый­лығы өтіп жатыр. Әр жыл сайын «Urker»-дің өз жаңалығы болады. Биыл байқауға 3 жаңа аталым қосыл­ды. Біз жаңа әрі креативті ме­диа­ның дамуына әрқашан қолдау көрсетеміз», деді А.Балаева.

Министрдің келтірген дерек­теріне сүйенсек, биыл конкурсқа қатысуға рекордтық көлемде – 450 өтінім түскен. Осы уақытқа дейін жалпы 74 БАҚ өкілі байқау жеңімпазы атанған.

«Таңдау оңай болған жоқ. Дегенмен қазылар алқасы өз шешімімен үздіктердің үздігін анықтағанына сенімдіміз. Олардың әрқайсысына қажырлы еңбегі үшін бөлек алғыс айтамын», деді Мәдениет және ақпарат министрі.

Айта кетерлігі, биыл байқау 12 аталым бойынша өтті, соның ішінде 3 жаңадан қосылған аталым бар. «Қазақ газеттері» жауап­кершілігі шектеулі серіктестігі құрамына кіретін «Ана тілі» газеті жүлдегерлер қатарынан табылды. Аталған марапатты Мемлекеттік кеңесші Ерлан Қарин басылымның бас редакторы Ерлан Жүніске табыстады. Осылайша, биылғы «Үркердің» арнайы сыйлығы – қазақ баспасөзінің ең қадірлі басылымы «Қазақ» газеті атындағы жүлде «Ана тілі» газетіне бұйырды.

«Биыл қазақ баспасөзі бас­тау алған «Қазақ» газетінің жа­рық көргеніне 110 жыл толып отыр. Осы жылдан бастап тарихи газет жарыққа шыққан 2 ақпан Ұлттық баспасөз күні деп бекітілді. Бар-жоғы 5 жыл оқырманға жол тартса да, «Қазақ» газеті мем­лекетіміздің тарихында өшпес із қал­дырып, ғасырдан-ғасырға жал­ғасып, ұрпақ санасында қайта жаң­ғырып жатыр. Оның айқын дәлелі – «Үркер» ұлттық сыйлығы аясын­да «Қазақ» газетінің 110 жыл­дық мерейтойына орай арнайы жүлде тағайындалғаны. Бұл – ке­зін­де Ахмет Байтұрсынұлы бастаған Алаш зиялыларының қолтаңбасы қал­ған басылымға құрметтің бір белгісі. Алқалы комиссия «Қазақ» газеті атындағы арнайы сыйлыққа маңдайында Ақаңның суреті мен ұрпаққа айтқан өсиеті жазылған «Ана тілі» газетін лайықты деп тауыпты. Сыйлық құтты болсын, әріптестер!», деді Е.Қарин.

ва

Сонымен «Жылдың үздік сұхбаты» аталымы «Time.kz» сайты­ның журналисі Ләйла Тас­тановаға бұйырды. Рабиға Дүсен­ғұлова («Tengrinews.kz») «Жылдың үздік репортажы» аталымында жеңіске жетті. Амангүл Тілейқызы («El.kz») әлеуметтік тақырыптағы үздік материал үшін марапатталды.

Сейдахмет Бердіқұлов атын­дағы арнайы аталым – «Жыл­дың үздік журналистік зерттеуі» Анна Величкоға («Golos-naroda.kz») бұйырды. Меруерт Сарсенова («Kapital.kz») «Жылдың үздік аналитикалық материалы» аталымында оза шапты.

Жылдың үздік жаңалықтар порталы ретінде «Nege.kz» сайты танылса, «Orda FM»-ның «Zhas STAR» бағдарламасы радиостансадағы үздік жоба атанды. Валерий Бугаев түсірген сурет жылдың үздігі болып танылды.

Үздік өңірлік БАҚ – «Сыр бойы» газеті (Қызылорда облысы), Үздік халықаралық БАҚ (бас­па радио интернет-журналистика саласындағы) – «Қазақ елі» журналы (Түркия) атанды. Әйнел Әмірхан жүргізетін «OY-DETOX» жобасы – үздік подкаст, Абай Сейфоллаұлының «Abay Live» жобасы – үздік You Tube каналы аталымында жеңіске жетті.

Бұдан бөлек, іс-шара аясында үздік баспасөз қызметі мен ақ­параттық сала қызметкерлері «Ақ­па­рат саласының үздігі» медалі­мен марапатталды. Мәдениет және ақпа­рат министрлігі қазақстандық жур­налистер арасында жүргізген сауал­даманың қорытындысы бойынша жылдың үздік баспасөз қызметі дипломы мен мүсіні Сырт­қы істер министрлігіне тапсырылды. Бұл марапатты Мәдениет және ақпарат министрлігі ақпарат және қо­ғаммен байланыс саласындағы нә­ти­желі жұмысы, сондай-ақ стра­тегия­лық коммуникацияны кәсіби тұрғыда жүзеге асырғаны үшін табыс етті.

Сыртқы істер министрлігінің баспасөз қызметі аталған аталымды осымен төртінші рет жеңіп отыр. Бұған дейін баспасөз қызметі 2017, 2018, 2022 және 2023 жылдары марапатталған еді.

ывап

«Бұқаралық ақпарат құралдары­ның өкілдеріне еліміздің сыртқы саяси ведомствосының қызметіне тұрақты қолдау көрсеткені және шынайы қызығушылық танытқаны үшін шын жүректен алғысымызды білдіреміз», дейді СІМ баспасөз қызметі өкілдері.

Сондай-ақ биыл Көлік министр­лігінің баспасөз хатшысы Жанжігіт Омархан, Қорғаныс министрлігінің баспасөз хатшысы Руслан Жан­гулин, Ұлттық қауіпсіздік комитеті баспасөз қызметі басшысының орынбасары Майгүл Айнабекова және Атырау облысы әкімінің бас­пасөз хатшысы Әсел Аудан­баева «Ақпарат саласының үздігі» медалінің иегерлері атанды.

Апталықтың соңғы күні үздік медиа менеджерлер мен PR-ма­мандар баспасөз хатшыларына арнап саладағы кадрлық әлеует­ті арттыруға және дамытуға бағыт­талған бірқатар семинар өттi. Медиа сарапшы, «Voice Power» агент­тігінің тренері Әлия Текенова шын­дық пен өтірікті ажыратуды үйре­тіп, «Факт-чекинг саясаткер­лер мен мансапшылар үшін қор­ға­ныс ретінде» тақырыбын түсіндірді.

Келесі тренингті «Мықты спи­кер­лер ортасындағы тең диа­лог­ті» журналист және медиа менед­жер, PR-кеңесші, «Voice Power» агенттігінің тренері Руслан Ыдырысов өткізді. Ал «iMAS Group» бас директоры Данияр Бибасар PR және баспасөз қыз­мет­теріне арналған ақпарат мони­торингі жүйесінің заманауи құрал­дары туралы айтып берді. «Жасан­ды интеллектің болашағы, жеке брендинг және қоғамдық қаты­нас­тардағы дағдарыс менеджменті» жөнінде коммуникациялар және жеке брендинг бойынша коуч, стратегиялық PR бойынша кеңесші Ақерке Берлібай тренинг жасады.