Үміт пен күдікке толы күн

Алғашқы күннің нәтижесі

Алдымен бұрнағы күні өткен жарыстың кешкі сессиясын­да­ғы спортшыларымыздың нәти­жесіне тоқталайық. Бұрнағы күні дзюдошыларымыз Абиба Әбужақынова (48 кило) – кү­міс, Мағжан Шамшадин (60 кило) қола медаль жеңіп ал­ға­нын жазған едік. Сондай-ақ қа­зіргі бессайысшылар Еле­на Потапенко мен Георгий Бо­ро­­да-Дудочкин жекелей жа­рыс қорытындысы бойынша олим­­пиадалық лицензия иеленді.

Қалған спортшылардың нә­тижелері де жаман емес. Мы­салы, спорттық гимнастикадан Нариман Құрбанов «ат үстінде жаттығу» бойынша финалға шықты. Ал бокстан 63,5 кило­ға дейінгі салмақ дәрежесінде Ертуған Зейноллинов жарыстың 1/16 финалына өтті.

Шахматтан Жансая Әбді­мәлік қарсыласынан басым түс­се, Бибісара Асаубаева тең тар­қасты. Ерлер арасында Қазыбек Нөгербектің есебінде екі жеңіс, Ринат Жұмабаевтың еншісінде бір жеңіс бар.

Гандболдан әйелдер құра­масы топтық кезеңде Таиланд құрамасын 44:20 есебімен ұт­ты. Теннистен Бейбіт Жұқаев жекелей сайыстың екінші раун­дында Тәжікстан спортшы­сы Фируз Мухидиновты жеңді. 6:0, 6:0. Жағажай волейбо­лы­­нан сынға түсіп жатқан Н.Алдаш­­ /К.Гурин және С.Богату/Д.Яков­лев жұптары ерлер арасында ши­рек финалға өтті.

 

Жұбаныш белдеуінде жеңіліс тапты

Жарыстың екінші күнінде алтын медальдан үмітсіз емес едік. Себебі бұл күні алтын алуға лайықты дзюдошыларымыз Ғұсман Қырғызбаев (66 кг), Данияр Шамшаев (73 кг), Абылайхан Жұбаназар (81 кг) секілді Азия чемпионы мен Үлкен дулыға жарысында жүлде алып жүргендер татамиге шығатын еді. Содан болар Ханчжоуға келген отандық журналистердің тең жартысы дзюдо өтетін спорт аренасына ат басын бұрды. Алайда бұл күні спортшылардың нәтижесі жанкүйерлер күткендей болмады.

73 кило салмақта сынға түс­кен дзюдошымыз Данияр Шам­шаев бірінші айналымда гон­конгтік балуаннан басым түсіп, жарысты сенімді бас­тады. Бірақ екінші айналымда ойда-жоқта тәжікстандық Берузи Хожазодаға есе жібер­ді. Ал жұбаныш белдесуінде қыр­ғызстандық балуанды ұт­қанымен қола жүлде үшін кү­рес­те моңғол балуанына шамасы жетпеді.

Ал Абылайхан Жұбана­зар (81 кг) бірінші айналымда гонконгтік балуанды, 1/4 финалда бахрейндік қарсыласын тізе бүктіріп, жартылай финал­ға жолдама алғанда «Алтын ала­ды-ау» деп үміттендік. Себебі Абылайхан биылғы Гранд-Слам­ның екі бірдей жарысында жүлдегерлер қатарынан кө­рінген еді. Бірақ жартылай финалда біздің жігітке қар­сы­лас атанған тәжік Сомон Мах­мад­беков те әккі балуан екен. Екеуара мықтыны анықтарда қарсыластың мерейі үстем болды. Финалға жолдама алған тәжік дзюдошысы алтын медаль алса, қола жүлде үшін кү­рескен А.Жұбаназар өзбек дзю­дошысы Муса Собировқа еш мүмкіндік бермей «иппон» әдісімен жеңіске жетті.

Бұл кеште тағы бір тәжі­рибелі дзюдошымыз Ғұс­ман Қырғызбаев татимеге шық­ты. Алайда Азия ойындарын­да жүлдеге іліккен жоқ. Бірінші белдесуінде жеңіске жеткен ол ширек финалда жеңілді. Артынша жұбаныш белдесуін­де де жеңіліс тапты. Дзюдодан Қазақстан құрамасының бас бап­кері Нұрбол Сүлейменов­тің айтуынша, Ғұсман ойланбай әдіс жасайтын балуан емес. Бірақ мұны төрешілер түсіне бермейді.

– Ғұсман ешқашан ойланбай әдіс жасамайды. Ешқашан арамдыққа бармайды. Бірақ Қырғызбаевтың бұл әрекетін басқалары жаттап алған. Сөй­тіп, олар әдіске кіріп кетеді. Төрешілер де сылбыр күресті деп есептейді. Жалпы алғанда, Ғұсман қайта-қайта ескерту ала­тындай лас күресетін балуан емес, – деді бапкер.

 

Қазақ-өзбек текетіресі – 2:0

Мироджан Юлдашевтің жеңісінен кейін қазақ-өзбек қыздары татамиге беттеді. Қола медаль үшін болса да екі ел арасындағы текетірес бұл жолы да жалғасын тапты. Оның үстіне қос елдің жанкүйерлері аренада бір жерге орналасқан екен. Бауырлас елдердің жанкүйерлері бір жерден киқулап өз спортшысына қолдау білдіріп жатты. БАҚ өкілдері орналасқан жерде де қазақ-өзбек журналистері «Қалай болады екен?» дегендей демдерін іштеріне тартып отырды.

Әйелдер арасында Эсмигүл Құйылова (63 кг) бірінші айналымда моңғолиялық балуан­­ның жауырынын жер иіскетіп, ке­ле­сі кезеңге шыққанымен, екін­ші кездесуде кореялық ба­луанға есе жіберді. Ал жұба­ныш белдесуінде филиппиндік дзюдошыдан басым болды. ­Қола жүлде үшін күресте Эсми­гүлге жеңіс ауадай қажет еді. Се­бебі оның қарсыласы өзбекстан­­дық Севениш Исокова-тұғын. Ал Эсмигүл – Өзбекстаннан келген қандасымыз. Өзінен бес жас үлкен қарсыласын «иппон» әдісімен жеңген Эсмигүл Азия ойындарының қола жүлдегері атанды. Бұл – жерлесіміздің әзір­ге ең ірі жеңісі.

Жарыстан кейін Эсмигүл Құйылова эксклюзивті сұхбат беріп, осы жетісікке жетелеген спорттағы әпкесі Абиба Әбу­жақыноваға алғысын айтты.

– Мен 21 жастамын. Бір жылдан бері Қазақстанның әйелдер құрамасында күресіп жүрмін. Бүгінгі қуанышымды сөзбен жеткізе алмаймын. Қат­ты қуанып тұрмын. Осы жүл­дем­ді ата-анама және барша Қазақ еліне арнаймын. Содан соң ме­нің дзюдодағы басты жана­шы­рым Абиба Әбужақыноваға рахмет айтамын. Ол ақыл-кеңесін аяған емес. «Жеңесің, кем дегенде үшінші орын аласың!», деп үнемі жігерлендіріп отырады. Өзім де осы кездесуге «Өліспей беріспеймін», деп шық­тым. «Қалайда жеңемін!», деген ой болды. Алғашында өзімнің қателігімнен қарсыласқа ұпай беріп қойдым. «Иппон» беретін шығар деп қобалжып тұрғанмын. Төреші тек «ваззари» деп есептеді. Сол кезде де мұның маған берілген мүм­кіндік екенін түсіндім де, барымды салдым. Айтарлықтай же­ңістерім жоқ. Елімді алда талай же­ңіспен қуантарым сөзсіз. Ма­ған бағыт-бағдар берген, ма­ған сенім артқан бапкерлер­ге мың алғыс. Осы медаль ірі же­ңістерге жол ашады деп сенемін, – дейді Эсмигүл.

Дәл осындай мүмкіндік Се­вара Нышанбаевада (57 кг) бол­ған еді. Ол бірінші айна­лым­да тәжікстандық балуанды жең­ді. Ал екінші айналымда тайпейлік әріптесіне есе жіберді. Жұбаныш белдесуінде БАӘ балуанына шамасы келмеді.

 

Өзбекстанның елеулі жетістігі

Әншейінде бокс болсын, кү­рес болсын, футбол болсын нәтижемізді өзбектермен салыстыратынымыз бар еді ғой. Осы жолы да Азия ойындарында өзара жарысып жатырмыз. Алашапанды ағайындардың «Өзбекстан 24» телеканалы­ның журналисі Норбек Ниязов­ты сөзге тартқанымызда, Азия ­ойындарына бас-аяғы 350 спортшы, спортшылардың жетіс­ті­гін насихаттау үшін 35 журналист келгенін мақтанышпен айтты.

Хош, 73 кило салмақта татамиге шыққан өзбек Мирод­жан Юлдашев қарсыластарының барлығын қоғадай жапырып финалға сүрінбей шыққанын өз көзімізбен көрдік. Ал финал­да дзюдоның отаны Жапония­­ның өкілі Соууши Хашимото­ны әбден әбігерге түсірді. Төрт минут бойы жапон спортшысы­нан ба­сым болған Мироджан Азия ойындарының алтын меда­лін мойнына тақты. Журналис­тер­ге берген сұхбатында өзінің мық­­ты екенін, әлі талай жарыс­та чемпион болатынын айтқан өзбек балуаны шынында да тең­дессіз екенін сары құрлыққа тағы бір мәрте дәлелдеді. Қазақ құ­рамасы алтын медаль аңсап жүргенде, Мироджан Юлдашев Өзбекстан құрамасына төртін­ші алтын медальді алып берді. Айтпақшы, 2022 жылы Азия чемпионатының финалында дәл осы Мироджан біздің жүлдесіз қалған Данияр Шамшаевтан жеңілген еді.

 

Жүгірген жетпес, бұйырған кетпес

Жарыстың екінші күнінде Никита Чирюкин қола медаль жеңіп алғаны қызық болды. Ол тапаншамен 10 метрге нысана көздеуден үздіктер қатары­на енді. Алдымен, Никита 10 метрге пневматикалық тапаншамен нысана көздеуден финалда сынға түсті. Ол іріктеу кезеңінде жетінші орын алып, финалдан сырт қалған еді. Алайда ақтық сынға өткен қы­тайлық спортшылардың бірін ережені бұзғаны үшін жарыс­тан шеттетіп, бос қалған орын­ға Никитаға жол ашылды. Нәти­жесінде, финалда Чирюкин ­жал­пы есепте 26 ұпай жинап, қола жүлде жеңіп алды.

– Аз ғана күш жетпеді. Жүй­ке де керек. Мұнымен тоқта­май, ­әрі қарай даму қажет. Физи­ка­лық әлеуетімді де, психоло­гияны де жетілдіру керек. Содан соң бұдан да жоғары нәтиже­ болады деп үміттенемін, – деді Н.Чирюкин.

Нысана көздеуден ерлер ара­сында Ислам Сатпаев – 6, Ассадбек Назиркулев – 9, Бах­тияр Ибраев 11-орыннан көрінді.

 

Ала-құла ойын

Бұл күні боксшы қызымыз Наталья Богданова (66 кг) сау­дия­лық қарсыласын мер­зі­мі­нен бұрын жеңді. Жаға­жай во­лей­болының ширек фи­на­лын­­да Қазақстан 1 (Богату/Яков­лев) командасы Қазақстан ­2 (Ал­даш&­Гурин) командасы­нан 2:1 есебімен басым түсті.

Ал ерлер арасында маунтинбайк веложарысында Денис Сергиенко мен Егор Карасев бесінші және алтыншы орыннан көрінді.

Ерлер арасында таеквондодан 58 кило салмақта сынға түскен Елдос Ысқақтың тым болмағанда қола медаль алуға мүмкіндігі бар еді. Ол 1/16 финалда Шығыс Тимор, 1/8 финалда Ливан спортшыларынан басым түскенімен, 1/4 финалда ойламаған жерден ауғанстандық Мохсен Резаейге 0:2 есебімен жол беріп қойды. Осылайша, М.Резаей Ауғанстанға әзірге жал­ғыз қола медальді алып берді.

Ал Ботагөз Қапанованың (49 кг) шамасы 1/4 финалға де­йін ғана жетті. Ол Мобина Не­матзадехтен (Иран) 0:2 есебімен ұтылды.

Академиялық ескек есуден Владислав Яковлев те, әйелдер құрамасы да 5-орын алды.

Теннистен жұптасып өнер көрсетуде Бейбіт Жұқаев/Де­нис Евсеев – Хазава Шинджи/Уесуги Катоға (Жапония) 0:2 есе­бімен жеңіліп қалса, Жібек Құ­ламбаева/Гозаль Айнит­ди­нова Қатар теннисшілерінен ­2:0 есебімен басым түсті.

Жекелей сында Денис Ев­сеев шығыстиморлық теннисшіге еш мүмкіндік бермесе (2:0), Григорий Ломакин/Дмитрий Попко жұбы оңтүстіккорея­лық теннисшілерге 1:2 есебімен есе жіберді. Жарыстың екінші айналымына шыққан Аружан Сағындықова үндістандық әріп­тесіне шамасы келмеді (0:2).

Су добынан Қазақстан әйел­дер құрамасы алғашқы ойында Сингапурден 9:5 есебімен басым түсті.

Регбиден Қазақстан әйелдер құрамасы Үндістан құрамасын 24:7 есебімен ойсырата жеңді.

Ал көгалдағы хоккейден Қа­зақстан құрамасы (әйелдер) Таиландтан 0:4 есебімен жеңілді.

Шахматтан 4-раундтың ойын­­дары аяқталды. Жекелей сында Бибісара Асаубаева индо­­незиялық Медина Варда Аулиа­дан басым түссе, Жан­сая Әб­дімәлік тағы бір Индо­незиядан келген Ирине Харисма Сукандарды жеңді.

Әзірше Бибісара Асаубаева 3 жеңіс, 1 тең нәтижемен 3-орында, Жансая Әбдімәлік 3 же­ңіспен 5-орында тұр. Ал ерлер бәсекесінде Ринат Жұмабаев Филиппин шахматшысы Пауло Берсаминаға, ал Қазыбек Нө­гербек алаң иесі Ю Вейге есе жіберді. Қазыбек Нөгербек 2,5 ұпаймен 8-орынға жайғасса, Ринат Жұмабаев 2 ұпаймен әзір­ге 18-орынға тұрақтады.

Семсерлесуден Назарбай Сат­тархан іріктеуден өте алмаса, Артем Саркисян ширек фи­налда кувейттік спортшыға 10:15 есебімен жеңілді.

Кешкі жарыс сессиясы бокс­шымыз Сәкен Бибосыновтың жеңісімен аяқталды. Ол моң­ғолиялық әріптесінен 5:0 есе­бі­мен басым түсті.