Көрме • 03 Қазан, 2023

Көрмеге 226 компания қатысады

205 рет
көрсетілді
2 мин
оқу үшін

Алғаш рет EXPO халықаралық көрме орталығында «Көлік және логис­тика» тақырыбында «TransLogistica Kazakhstan-2023» көрмесі өтеді. Бұл іс-шара отандық көлік апталығы аясында ұйымдасты­ры­лып отыр.

Көрмеге 226 компания қатысады

ФОТО: facebook.com/translogistika

4-6 қазан аралығында өз елі­мізді қоса алғанда Әзербайжан, Бела­русь, Германия, Иран, Италия, ҚХР, Қыр­ғызстан, Литва, Латвия, Польша, Ресей, Түрікменстан, Түркия, Өзбекстан, Фин­лян­дия, Эстониядан келетін 226 компания өз стендтерін ұсынатын болады.

Осы орайда Қазақстан Азия мен Еуропа арасындағы негізгі тран­зиттік орталық ретіндегі өз ұс­танымын ны­ғай­тып келе жат­қан­дығын айта кеткен орынды. Қаты­су­шылар саны өткен жылмен са­лыстырғанда 40%-ға жуық арт­қан. Көрмені ұйымдастыру бары­сындағы тағы бір ерекшелік – Германия, Қытай және Түркиядан қатысып жат­қан компаниялардың көп болуы. Сондай-ақ «TLO GmbH Internationale Spedition» (Германия), «ATTRADING» (Польша), «Logitrans Lojistik A. S.», «Gurkan Nakliyat», Destan Transport» (Түркия) және басқа да компаниялар өз стендтерін алғаш рет ұсынып отыр.

Сонымен қатар Латвия, Литва, Финляндия және Эстония елдері­нен қатысушылар көлік және қойма логистикасына арналған техно­логия­лық шешімдерді ұсынады. Бұл – елімізде бизнесті дамытуға айтар­лық­тай қызығушылық бар екендігінің бірден-бір көрсеткіші.

Отандық компаниялардың қаты­су көрсеткіші шамамен 40 пайыз­ды құрайды. «Қазақстан Темір жолы­ның» құрамына кіретін компаниялар үлкен ұжымдық стендімен 2023 жылғы экспозицияның сән-салтана­тын одан әрі аша түспек. Қазақстан­дық көлік апталығы аясында қызықты іс­кер­лік бағдарлама жоспарланып отыр. Бағдарлама шеңберінде VI Ха­лық­аралық «New SILK WAY» көлік-ло­гистикалық бизнес-форумы (04.10.2023, Hilton Astana) және «Қазақстандағы қойма логистикасы нарығы», «Каспий теңізіндегі порттарды, терминалдарды және кеме қатынасын дамыту» және «Көлік және логистика нарығы» (4-6.10.2023, EXPO халықаралық көрме орталығы) конференциялары өтеді.

Бизнес-форумда сарапшылар мен қатысушылар көлік жүйелерінің ынтымақтастығы мен интеграциясы, орта дәліз бағытын дамыту, сондай-ақ мультимодальды тасымалдау сала­сындағы жаңа технологиялар мен инновация­лар, жүктерді тасымалдау тиімділігін арттыру және жет­кізу жағдайларын жақсарту мәсе­лелерін талқылайды. Іс-шараға 23 ел­ден 500-ден астам делегат қаты­сады деп күтіліп отыр. Іскерлік бағ­дар­ламадан басқа салалық ми­нистр­ліктер, ведомстволар, қауым­дас­тықтар мен халықаралық ком­па­ниялар басшылығының қатысуы­мен екіжақты кездесулер мен келіс­сөздер жоспарланған. Айта кетер­лігі, фо­рум­ға келуші­лер мен қа­тысу­шы­лар­дың ыңғай­лы­лығы үшін  биыл «Ite­ca» мобильді қосымшасы іске қосылды.