Фестивальде 6 шетелдік және 8 қырғыз театры бақ сынады. «АРТ ОРДО – 2023» халықаралық театр фестиваліне әр елден театр қайраткерлері мен театр зерттеушілері шақырылды. Халықаралық қазылар алқасын Қазақстанның халық әртісі, Мемлекеттік сыйлықтың лауреаты, Жастар театрының көркемдік жетекшісі, профессор Нұрқанат Жақыпбай басқарды. Сонымен қатар қазылар алқасының құрамында Өзбекстанның Халық әртісі, Өзбекстанның Ұлттық академиялық драма театрының актрисасы Гаухар Закирова, Қырғыз Республикасының Халық әртісі, Қазақстанның еңбек сіңірген әртісі, актриса Гүлсара Әжібекова, Әзербайжанның Халық әртісі, Әзербайжанның еңбек сіңірген мәдениет қайраткері, театр және кино актері, режиссер Джахангир Муталлиб оглы Новрузов, Қырғызстан Театр қайраткерлері одағының президенті, өнертану кандидаты Жаныш Құлмамбетов, театр сыншысы, өнертану кандидаты Айсұлу Сағитова (Башқұртстан, Ресей), театр сыншысы және режиссері Исмаил Дикилиташ (Түркия) болды.
Халықаралық қазылар алқасы «Үздік қойылым» – бас жүлде, «Үздік режиссер», «Үздік сценография», «Үздік ер адам рөлі», «Үздік әйел адам рөлі», «Екінші пландағы ер адам рөлі», «Екінші пландағы әйел адам рөлі», «Сыншылар көзайымы» аталымдары бойынша жүлдегерлерді анықтады.
Қырғызстан көрермені Қалибек Қуанышбаев атындағы мемлекеттік академиялық қазақ музыкалық драма театрының спектаклін зор ықыласпен қабылдады. Сахнада актерлерден басқа, оркестр де өнер көрсетті. Бұл драмалық шығарманың әсерін арттыра түсті. Халық аспаптар оркестрі барлық музыкалық партияларды жанды мәнерде орындап, спектакльге өзгеше сипат берді. Сахнада ескі заман хикаясы заманауи әуенмен өрбіп отырды. Тіпті Майкл Джексонның әндерінен де үзінді орындалды. Осылайша, автор классикалық құр баяндаудан бас тартып, Қозы Көрпеш пен Баян Сұлудың махаббат хикаясын заманауи тәсілде жеткізе білгені үшін Қаллеки театрының ұжымы Ғ.Мүсіреповтің «Қозы Көрпеш – Баян сұлу» спектаклі үшін Гран-при жүлдесімен және ТҮРКСОЙ Халықаралық түркі мәдениеті ұйымының арнайы сыйлығымен марапатталды.
Қоюшы режиссер – Гүлназ Балпейісова, дирижер – Маралжан Мырзақұлова, қоюшы суретші – Қанат Мақсұтов, киім суретшісі – Алма Сырбаева, хореограф – Ильмира Иманғазина, композитор – Олег Синкин.
Спектакльде Қазақстанның еңбек сіңірген қайраткері А.Нөгербек, «Дарын» Мемлекеттік жастар сыйлығының лауреаты Ж.Ерболат, «Серпер» сыйлығының лауреаттары – Ш.Ордабаев, О.Жақыпбек, актриса А.Жетпісбаева, актер Н.Есен, М.Наменов, Б.Шалқар, С.Анварова, Б.Қалила, А.Мамыр, Ә.Бектас, М.Макибаева және халық аспаптар ансамблі өнер көрсетті.
