Үкімет • 09 Қазан, 2023

Автожолдар мен көшелерді қысқа даярлау

155 рет
көрсетілді
2 мин
оқу үшін

Премьер-министрдің бірінші орынбасары Роман Склярдың төрағалығымен өткен селектор­лық кеңес барысында жергілікті жолдардың қысқа дайындығы талқыланды.

Автожолдар мен көшелерді қысқа даярлау

Көлік министрлігі Автомобиль жолдары комитетінің төрағасы Төле­ген Абдуллин министрлік пен әкімдік­тер әзірлеген іс-қимыл жоспарын баян­дады.

Қазақстандағы жергілікті маңызы бар автожолдар мен елді мекендер көшелерінің жалпы ұзындығы 131 мың шақырымды құрайды, оның 70 мың шақырымы – облыстық және аудандық жолдар.

Биыл жергілікті маңызы бар автожолдар мен елді мекен көшелерін күтіп ұстауға жергілікті бюджеттен 76 млрд теңге бөлінді. 270 арнайы ком­муналдық мекеме тартылды. Арнайы техниканың 9,6 мың бірлігі мен 22 мың жол қызметкерін жұмылдыру көзделген.

Қыс мезгілінде қауіпсіз және үздіксіз жол қозғалысын қамтамасыз ету үшін 13 мың тонна жанар-жағармай және 332 мың тонна көктайғаққа қарсы материалдар әзірленді. Атап айтқанда, 51 мың тонна тұз, 141 мың тонна құм, 139 мың тонна ұнтақ, 804 тонна реагент, 2,3 мың тонна бензин, сондай-ақ 10,3 мың тонна дизель отыны.

Көлік министрлігіне қарасты Автомобиль жолдары комитетінің төрағасының айтуынша, облыстар мен Алматы және Шымкент қалаларының әкімдіктері ІІМ және ТЖМ аумақтық бөлімшелерімен келісілген Жол карталарын бекітті. Қазіргі уақытта өңірлерде осы бағыттағы жұмыстар күшейтілген.

Кеңес қорытындысы бойынша Премьер-министрдің бірінші орынбасары қажетті қаражатты қарастыра отырып, автомобиль жолдарын дайындауға бақылауды күшейту бойынша бірқатар тапсырма берді. Ішкі істер және Төтенше жағдайлар министрліктеріне қолайсыз күн райы жағдайларында көлік құралдарының қауіпсіз және үздіксіз жүруін қамтамасыз ету бойын­ша аумақтық бөлімшелер мен жер­гілікті атқарушы органдардың өзара іс-қимылының нақты алгоритмін белгілеу тапсырылды.