Тағзым • 09 Қазан, 2023

Өлеңі әнмен үйлескен

268 рет
көрсетілді
4 мин
оқу үшін

Қызылордада Қазақстанның еңбек сіңірген қайраткері, ақын Шөмішбай Сариевті еске алу кеші өтті. Айдынды Арал жағалауында өмірге келген ақын рухына арналған іс-шара Ә.Тәжібаев атындағы әмбебап ғылыми кітапханадағы «Күнге қарай жүремін...» атты поэзия кешінен бастау алды. Кітапханада «Теңіз тудырған талант» атты кітап көрмесі ұйымдастырылып, жастар өлең оқыды. Әншілер ақын өлеңіне жазылған әндерді орындады.

Өлеңі әнмен үйлескен

Шөмішбай Сариев – әдебиетке жет­пісін­ші жылдары келген талантты лектің өкі­лі. Сол жылдары «Балдәурен» атты тыр­нақалды жинағы жарық көрген ақын – он бес шақты кітаптың авторы. Қа­зақтың қабырғалы қаламгері Ғафу Қайыр­бе­ков «Шөмішбай – қос қанатты ақын. Біріншісі, лирикалық жырлары болса, екіншісі – ән-өлеңдері. Поэзияның екі са­ласы ақынның қос қанатына айналған» деп бағалаған ақынның 300-ден астам өлеңі әуезді әнге айналған.

Поэзия кешінде жазушы Сайлаубай Жұбатыров, ақын Қатира Жәленова, Мақ­­сат Дауылбай естелік айтып, кешті ұйым­дастырушыларға алғысын жеткізді.

«Жалпы, қазақ руханиятының табал­ды­рығын аттаған кез келген толқын, Мұх­тар Әуезов айтпақшы, «жыл келген­дей жаңалық сезіндіргісі» келетіні анық. Бұл тарапта жетпісінші жылдары әде­биет­ке келген біздің жолымыз болды. Әдебиетіміздің абызы Мұзафар аға Әлім­баев Мұқаңның осы біз ауыз сөзін қай­талай айтып, бізді аялап отыратын еді. Бүгінгі кеште соның бәрі еске түсіп отыр. Туған жерін өшпес әнге өзек еткен Шөкең – армансыз ақын. Бүгінгі кешке жары Жұмакүл Сариева балаларын да ертіп келген екен. Тамырын туған жерден үзбеген ақынның өзі де, мұрасы да ұмы­тылмайды», деді Сайлаубай Жұбатыров.

Ақын Қатира Жәленова әдебиетте қатар жүрген қаламгер туралы естелігінде Шө­мішбай Сариевтің «Тамаша» ойын-сауық отауының көрерменге жол тартуы үшін жасаған толымды еңбегіне тоқталды. Еске алу кешіне жиналғандар облыстық тарихи-өлкетану музейіндегі ақыннан қалған естелік мұраны тамашалады.

Осы күні кешкілік Н.Бекежанов атындағы облыстық драма театрға жиыл­ған жұрт Шөмішбай Сариев шығар­машылығына арналған «Теңіздей тебі­рендім, тербедің…» атты кештің көрер­мені болды. Облыс әкімі Нұрлыбек Нәлі­баев кеш қонақтарын құттықтап, Шө­мішбай Сариевтің ел мәдениетіне қос­қан үлесін атап өтті.

«Сырда туып, аты алты Алашқа та­нылған дарын иелерінің қатарында ақын Шөмішбай Сариевтің есімі ерек­ше. Сыр жұрты өз перзенттерін әр­дайым құрмет тұтып, еңбегін ешқашан ұмытпайды. Дарынды тұлғаның өнегелі өмі­рін ұрпаққа насихаттап, қазынасын алтын қорда сақтайды. Қазақ өнерін өрге жүздірген Сыр перзенті Шөмішбай ағамыздың рухы шат, ұрпағы аман болсын», деді аймақ басшысы.

Нұрлыбек Машбекұлы ақынның жұбайы Жұмакүл Сариеваға құрмет танытып, бүгінгі кешке орай Мемлекет басшысының арнайы құттықтау хатын табыстады. Көп алдында елге ризалығын білдірген Жұмакүл Сариева екі жыл бұрын 75 жасына екі ай қалғанда өмірден озған ақын рухына ғылыми-танымдық конференция арнаған аралдықтардың құрметі көңілін толқытқанын атап өтті. Одан кейін де Сыр елінде ақынның есімін құрметтеп, еңбегі мен шығармашылығын дәріптеу үзілген емес. Облыстық тарихи-өлкетану музейінің өнер залында бұрыш ашылды.

Кеште Қазақстанның халық әртістері Роза Рымбаева, Мақпал Жүнісова, әнші Жеңіс Ысқақова, Сүлеймен Ибрагимов, Жұбаныш Жексенұлы ақын өлеңдеріне жазылған әндерді орындады.

 

ҚЫЗЫЛОРДА